លោក យិន ហេង ហៅ ចំប៉ីខ្មៅ បានចេញមុខបកស្រាយចំពោះវីដេអូដែលបានបង្ហោះកន្លងទៅរួមទាំងលុបវីដេអូនោះ និងបានលើកដៃសូមទោស អាជី ជាសាធារណៈបន្ទាប់ពីទទួលបានលិខិតជូនដំណឹងពីមេធាវីអាជីទុកពេលឱ្យខ្លួនរយៈពេល៤៨ម៉ោងចេញមុខសូមទោសនិងលុបវីដេអូ។
នៅយប់ថ្ងៃទី២១ ខែវិច្ឆិកា ឆ្នាំ២០២៣ នៅលើផេក Yin Heng ចំប៉ីខ្មៅ បានបង្ហោះវីដេអូជាង៦នាទីដោយបានរៀបរាប់ពីមូលហេតុផ្សេងៗនិងការសូមទោសរបស់ខ្លួន។ ចំប៉ីខ្មៅ បាននិយាយថា ខ្លួននឹងអាជី មិនដែលមានទំនាស់អ្វីជាមួយគ្នាទេហើយមកទល់ថ្ងៃនេះមិនបានឈ្លោះទាស់ទែងពាក្យសម្តីឬជេរគ្នានៅតាមបណ្តាញសង្គមអីដែរ។ ចំប៉ីខ្មៅ បកស្រាយទៀតថា ខ្លួននិងអាជីគឺបានជជែកគ្នាពិតមែន ដោយអាជីបានឱ្យUpdate លើរឿងដែលបង្ហោះកាលពីថ្ងៃទី១៧ ហើយការដែលខ្លួនចេញវីដេអូនោះ ដោយសារតែមានការបែកធ្លាយសំឡេងរបស់អាជីនៅលើបណ្តាញសង្គម ទើបខ្លួនយកសំឡេងនោះមកនិយាយមកបកស្រាយទាក់ទងនឹងប្រព័ន្ធផ្លូវច្បាប់។
ចំប៉ីខ្មៅ បន្តទៀតថា ក្នុងនាមជាអ្នកបញ្ចប់ការសិក្សាផ្នែកច្បាប់មួយរូបតាមលិខិតជូនដំណឹងរបស់មេធាវីអាជី ចំប៉ីខ្មៅ បានលើកដៃសូមទោសអាជី ដែលបានយកសារសំឡេងរបស់អាជី មកបកស្រាយនាំឱ្យមានផលប៉ះពាល់ផ្សេងៗ។ ចំប៉ីខ្មៅ បានបញ្ជាក់ទៀតថា ការដែលខ្លួនយល់ព្រមជាមួយអាជី ថាចេញវីដេអូបន្ថែមហើយប៉ុន្តែមិនបានចេញវិញដោយសារតែខ្លួនជួបបញ្ហាសុខភាព។
បន្ថែមពីលើនេះដែរ ចំប៉ីខ្មៅ បានពន្យល់ទៀតថា នេះគឺជារឿងមួយដែលអ្នកមិនទាន់យល់ដឹងផ្នែកច្បាប់ ការដែលចេញលិខិតជូនដំណឹងពីមេធាវីអាជី មិនមែនជាលិខិតកោះហៅជាពាក្យបណ្តឹងដល់តុលាការនោះទេគឺជាលិខិតជូនដំណឹងឱ្យខ្លួនធ្វើទៅតាមលិខិតជូនដំណឹងនោះដោយ ចំប៉ីខ្មៅ អះអាងថា ខ្លួនមិនមានជម្លោះជាមួយ អាជី ឡើយ។
សូមរម្លឹកផងដែរថា មេធាវីតំណាងឱ្យកូនក្តីឈ្មោះ «តេង ស៊ីណាត» ហៅអាជី បានចេញលិខិតជូនដំណឹងកាលពីថ្ងៃទី២០ វិច្ឆិកា ទៅកាន់លោក យិន ហេង ហៅ ចំប៉ីខ្មៅ ឱ្យសូមទោសកូនក្តីរបស់ខ្លួនជាសាធារណៈ និងលុបវីដេអូដែលបានបង្ហោះជាបន្ទាន់ក្នុងរយៈពេល៤៨ម៉ោង មិនដូច្នេះទេនឹងមានវិធានការតាមផ្លូវច្បាប់៕.PNG)
