តើអ្នកដឹងទេថា ប្រទេសណាខ្លះដែលមានប្រជាជនកម្ពស់ខ្ពស់ជាងគេ?

ប្រជាជននៅតាមបណ្តាប្រទេសនីមួយៗសុទ្ធតែមានកម្ពស់ខុសៗគ្នា ដោយប្រទេសខ្លះក៏សម្បូរទៅដោយមនុស្សខ្ពស់ៗ រីឯប្រទេសខ្លះទៀតក៏សម្បូរទៅដោយមនុស្សដែលមានកម្ពស់ទាបច្រើនផងដែរ។ ដូច្នេះហើយ យោងតាមគេហទំព័រ World Population Review បានឱ្យដឹងថា នៅលើពិភពលោកមានប្រទេសចំនួន ៧ ប៉ុណ្ណោះដែលត្រូវបានគេចាត់ទុកថាជាប្រទេសដែលមានប្រជាជនកម្ពស់ខ្ពស់ជាងគេ ក្នុងនោះមានដូចជា៖

១.ប្រទេសនែតដឺលែន (Netherlands)៖ នែតដឺលែន គឺជាប្រទេសដែលមានប្រជាជនទូទៅខ្ពស់ៗជាងគេលើលោក ដោយប្រជាជននែតដឺលែនមានកម្ពស់ជាមធ្យម ១៧៥.៦២ សង់ទីម៉ែត្រ ខណៈបុរសមានកម្ពស់មធ្យម ១៨២.៥៣ សង់ទីម៉ែត្រ និងស្រ្តីកម្ពស់ ១៦៨.៧២ សង់ទីម៉ែត្រជាមធ្យម។

២.ប្រទេសឡេតូនី (Latvia)៖ ជនជាតិឡេតូនីមានកម្ពស់ ១៧៥.៦១ សង់ទីម៉ែត្រជាមធ្យម ដោយបុរសមានកម្ពស់មធ្យម ១៨១.៤២ សង់ទីម៉ែត្រ និងស្រ្តីមានកម្ពស់មធ្យម ១៦៩.៧៩ សង់ទីម៉ែត្រ។

៣.ប្រទេសអេស្តូនី (Estonia)៖ ពលរដ្ឋអេស្តូនីជាមធ្យមមានកម្ពស់ ១៧៥.១៣ សង់ទីម៉ែត្រ ក្នុងនោះបុរសមានកម្ពស់មធ្យម ១៨១.៥៩ សង់ទីម៉ែត្រ ហើយស្រ្តីមានកម្ពស់មធ្យម ១៦៨.៦៧ សង់ទីម៉ែត្រ។

៤.ប្រទេសដាណឺម៉ាក (Denmark)៖ ប្រជាជនដែលរស់នៅក្នុងប្រទេសសម្បូរអាហារមានជីវជាតិមួយនេះវិញ មានកម្ពស់ជាមធ្យម ១៧៤.២៩ សង់ទីម៉ែត្រ ដោយបុរសកម្ពស់ ១៨១.៣៨ សង់ទីម៉ែត្រជាមធ្យម ខណៈស្រ្តីកម្ពស់ ១៦៧.២១ សង់ទីម៉ែត្រជាមធ្យម។

៥.ប្រទេសឆែក (Czech Republic)៖ ប្រជាជនឆែកទូទៅមានកម្ពស់ជាធម្យម ១៧៤.២៨ សង់ទីម៉ែត្រ ដោយបុរសមានកម្ពស់ ១៨០.១០ សង់ទីម៉ែត្រជាមធ្យម ចំណែកស្រ្តីមានកម្ពស់ ១៦៨.៤៥ សង់ទីម៉ែត្រជាមធ្យម។

៦.ប្រទេសស៊ែប៊ី (Serbia)៖ ជនជាតិស៊ែប៊ីមានកម្ពស់ជាមធ្យម ១៧៤.១៣ សង់ទីម៉ែត្រ ក្នុងនោះបុរសមានកម្ពស់មធ្យម ១៨០.៥៧ សង់ទីម៉ែត្រ រីឯស្រ្តីមានកម្ពស់មធ្យម ១៦៧.៦៩ សង់ទីម៉ែត្រ។

៧.ប្រទេសប៊ែលហ្ស៉ិក (Belgium)៖ ពលរដ្ឋប៊ែលហ្ស៉ិកជាមធ្យមមានកម្ពស់ ១៧៣.៥៩ សង់ទីម៉ែត្រ ដោយបុរសកម្ពស់ ១៨១.៦៩ សង់ទីម៉ែត្រជាមធ្យម ខណៈស្រ្តីកម្ពស់ ១៦៥.៤៩ សង់ទីម៉ែត្រជាមធ្យម៕