ថ្មីនេះមានការចាប់អារម្មណ៍ជាថ្មីទៅលើអ្នកនាង គឹម លីហ្សា ដែលប្រឡូកលើអាជីពកំប្លែង បានមួយរយៈថានាងលែងលះជាមួយស្វាមីហើយដោយតស៊ូចិញ្ចឹមកូន២តែម្នាក់ឯង។ ក្នុងនោះដែរក៏មានការលើកឡើងថានេះគ្រាន់ជាការសម្តែងរបស់តារាស្រីរូបនេះប៉ុណ្ណោះ ដើម្បីទាញចំណាប់អារម្មណ៍ ខណៈសាមីខ្លួនបានចេញមុខឆ្លើយតបទៅវិញផាំងៗតែម្តង។
គេចាំបានថា កាលពី១ឆ្នាំមុន គឹម លីហ្សា បានប្រកាសបញ្ចប់ទំនាក់ទំនងជាមួយស្វាមី ជាអនិកជនម្តងរួចមកហើយថែមទាំងប្រកាសក្តែងៗថាជា Single Mom ទៀតផង។ ទោះយ៉ាងណា គ្រាន់តែប្រកាសមិនបានប៉ុន្មានផងស្រាប់តែគេឃើញនាងនៅកៀកកើយជា មួយស្វាមីដដែលថែមទាំងបញ្ចេញរូបថតអាពាហ៍ពិពាហ៍ត្រៀមឡើងគេហដ្ឋានថ្មីជាមួយគ្នាទៀតផង។ សកម្មភាពនេះ គឹម លីហ្សា ក៏ត្រូវអ្នកលេងបណ្តាញសង្គមសម្តែងក្តីហួសចិត្ត និងលើកឡើងថានេះជាយុទ្ធសាស្រ្តទីផ្សារអនឡាញដែលអ្នកមួយចំនួនចូលចិត្តធ្វើឡើងដើម្បីទាញការចាប់អារម្មណ៍ប៉ុណ្ណោះ។
ក្រោយពីព័ត៌មានលែងលះគ្នាតែមហាជនចាប់បានថា គឹម លីហ្សា និងស្វាមី រស់នៅក្នុងផ្ទះតែមួយដូចគ្មានរឿងអ្វីកើតឡើងគ្រានោះ គឹម លីហ្សា ក៏បានចេញមុខបញ្ជាក់ពីចំណងអាពាហ៍ពិពាហ៍របស់នាងនៅតែរឹងមាំដូចធម្មតា ថែមទាំងមានគម្រោងចេញទៅរស់នៅប្រទេសអូស្រ្តាលីតាមស្វាមីទៀតផង។
យ៉ាងណាមិញ ស្រាប់តែថ្មីៗនេះ គឹម លីហ្សា បានបង្ហាញពីលិខិតលែងលះជាមួយស្វាមី លោក គីវ វុធ្ឍី ដោយអ្នកទាំងពីរលែងលះគ្នាជាង១ឆ្នាំហើយ ដោយកូនទាំង២ រូបនាងជាអ្នកទទួល បន្ទុកតែម្នាក់ឯង។
យ៉ាងណាមិញ ដំណឹងលែងលះជាមួយថ្មីនេះ ធ្វើឱ្យមហាជនភ្ញាក់ផ្អើលម្តងទៀត ប៉ុន្តែ ក៏មានអ្នកជឿនិងមិនជឿផងដែរព្រោះតារាស្រីរូបនេះធ្លាប់ផ្តល់បទពិសោធន៍ឱ្យកាលពីលើកមុនខណៈគេសង្កេតឃើញថាពួកគេទាំងពីរនាក់តែងតែបណ្តើរគ្នានិងពិភាក្សាការងារជាមួយដៃគូដដែល។
ដោយហេតុមានអ្នកមិនជឿលើការលែងលះគ្នាដោយថានេះគ្រាន់តែជាការសម្តែង គឹម លីហ្សា បានបង្ហោះសារមួយថា «គ្មានអ្នកណាឆ្កួតយករឿងគ្រួសារឯងមកសំដែងនោះទេ សមត្ថភាពរកលុយខ្ញុំមានពេញខ្លួន ទាន់?»៕