តារាចម្រៀងរ៉េបជួរមុខរបស់កម្ពុជា ម៉ាន់ វណ្ណដា បានធ្វើឱ្យអ្នកគាំទ្របើកភ្នែកធំៗសូម្បីតែតារាចម្រៀងរូបនេះផ្ទាល់ភ្ញាក់ផ្អើលដូចគ្នា បន្ទាប់ពីនៅលើឆាណែលយូធូបផ្ទាល់ខ្លួនរបស់លោកមានអ្នកទស្សនាសរុបរហូតដល់ ១០០០លានដង ហើយនេះក៏ជាប្រវត្តិសាស្រ្តសម្រាប់សិល្បករកម្ពុជាដែលអាចទទួលបានយ៉ាងច្រើននេះនៅលើឆាណែលផ្ទាល់ខ្លួន។
មិនត្រឹមតែសាងភាពល្បីល្បាញក្នុងប្រទេសតែប៉ុណ្ណោះទេ តែតារាចម្រៀងមានដើមកំណើតខេត្តព្រះសីហនុ វណ្ណដា ធ្វើឱ្យបណ្តាប្រទេសជាច្រើនទទួលស្គាល់តារាចម្រៀងកម្ពុជារូបនេះដែលមានទេពកោសល្យខ្លាំងទៅលើតន្រ្តីជាពិសេសការរ៉េបរបស់លោកផ្ទាល់។ មានល្បីល្បាញនេះបានជំរុញឱ្យ វណ្ណដា បំបែកប្រវត្តិសាស្រ្តក្លាយជាសិល្បករខ្មែរដំបូងដែលមានអ្នកទស្សនា១០០០លានដងនៅលើឆាណែលផ្ទាល់ខ្លួន។
សមិទ្ធផលនេះ វណ្ណដា បានពោលពាក្យទៅកាន់អ្នកគាំទ្ររបស់ខ្លួនថា «អរគុណទាំងអស់គ្នាដែលធ្វើឱ្យ ១,០០០លាន មានវត្តមាននៅលើ Channel របស់ខ្ញុំ You guys are amazing, appreciate it.»។
គួរបញ្ជាក់ផងដែរថា យូធូបរបស់ វណ្ណដា គិតមកទល់ពេលនេះអ្នក Subscribed ជិត៤លាន Subscribe បង្កើតឡើងនៅថ្ងៃទី១១ ខែមេសា ឆ្នាំ២០១៧ មានវីដេអូសរុបចំនួន១២៥ ហើយបទដែលមានអ្នកទស្សនាច្រើនមានដូចជាបទ «Time To Rise» , «ម្តាយ» ច្រៀងជាមួយក្រុមក្មេងខ្មែរ , «BORN THIS WAY» , «J+O (Remix) ft. Reezy & Khmer1jivit» និងបទល្បីៗជាច្រើនទៀត៕