ជ្រូករស់ចំនួន៧៣ក្បាលនាំចូលពីប្រទេសវៀតណាមខុសច្បាប់បម្រុងដឹកមករាជធានីភ្នំពេញ ត្រូវបានក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យស្រាវជ្រាវ និងបង្ក្រាបអំពើរត់ពន្ធតំបន់៦ចុះបង្រ្កាបបាន។
ការចុះបង្រ្កាបនេះធ្វើឡើង នៅចំណុចភូមិស្ទឹងកាច់ ឃុំកក់ ស្រុកពញាក្រែក ខេត្តត្បូងឃ្មុំនៅថ្ងៃទី៣០ ខែមីនា ឆ្នាំ២០២៣ នាវេលាម៉ោង១០ និង៣០នាទីព្រឹក ដោយឃាត់បានរថយន្ត០១គ្រឿង ម៉ាក Ssangyong Istana ពណ៌ស ជាប្រភេទរថយន្តដឹកអ្នកដំណើរ១៥កៅអីស្លាកលេខ ភ្នំពេញ ២N-៣៥០១ ។
តាមការបញ្ជាក់បន្ថែមបានឱ្យដឹងទៀតថា ជ្រូករស់ទាំង៧៣ក្បាលនេះនាំចូលពីប្រទេសវៀតណាម មកកាន់ប្រទេសកម្ពុជា តាមច្រករបៀង ស្រុកពញាក្រែក ខេត្តត្បូងឃ្មុំ បម្រុងនឹងយកទៅចែកចាយនៅរាជធានីភ្នំពេញដោយគ្មានលិខិតអនុញ្ញាតអ្វីទាំងអស់។ បន្ទាប់ពីសាកសួរ ក្រុមការងារអន្តរាគមន៍បង្ក្រាបបទល្មើសចលនាសត្វ បាននាំយកបទល្មើស និងវត្ថុតាងទាំងនោះទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ ៕