នារីម្នាក់ប្រកាសទាមទារយុត្តិធម៌ឱ្យក្មួយប្រុសអាយុ៥ឆ្នាំបាត់បង់ជីវិត ក្រោយពេទ្យដកធ្មេញម្តង៧គ្រាប់

នារីម្នាក់មានគណនីហ្វេកប៊ុកឈ្មោះ Yan Nich បានបង្ហោះរូបភាពនិងសារនៅថ្ងៃទី៣១ ខែមីនា ដែលកំពុងមានទុក្ខជាទម្ងន់ទាមទាររកយុត្តិធម៌ជូនក្មួយរបស់ខ្លួនអាយុ៥ឆ្នាំដែលត្រូវបាត់បង់ជីវិតទាំងវ័យក្មេង ក្រោយគ្រូពេទ្យដកធ្មេញម្តង៧គ្រាប់។

តាមការរៀបរាប់របស់គណនី Yan Nich បានសរសេរថា «មានដែរទេក្មេងអាយុ ៥ឆ្នាំ ដកធ្មេញម្ដង៧គ្រាប់ ថ្ងៃនេះគ្រួសារខ្ញុំមានទុក្ខជាទម្ងន់ មិនគួរណាក្មួយខ្ញុំជួបរឿងបែបនេះទេ លឿនពេកហើយ ក្មួយខ្ញុំដំបូងឡើយ ឈឺធ្មេញក៏ទៅមន្ទីរពេទ្យ… ដកធ្មេញម្ដងចំនួន ៧គ្រាប់ បន្ទាប់មកក្រោយដករួច ក្មួយខ្ញុំចាប់ផ្ដើម ហើមពោះ សាច់ប្រែជាលឿងអស់ ថាក្មួយខ្ញុំខ្សោយតំរង់នោម ថ្លើមរីក ហើយខ្សោយខ្លាំងណាស់ គេមិនអាចធ្វើអីបានទេ ថាសុខភាពគាត់ខ្សោយ ក្មួយខ្ញុំក្លាយជាពិការភ្នែក មើលលេងឃើញ..»។

នារីខាងលើនេះបានបន្តថា «បានប្រហែលជា១ សប្ដាហ៍ ក្មួយខ្ញុំបានស្លាប់ ដោយគ្មានមូលហេតុណាច្បាស់លាស់ឡើយ អាយុ៥ឆ្នាំ ជាតិក្រោយសុំឱ្យក្មួយមានអាយុវែង កុំឱ្យដូចជាតិនេះ ជួយរកយុត្តិធម៌ឱ្យក្មួយខ្ញុំ ឱ្យក្មួយខ្ញុំទៅអោយបានសុខសូមផ្តាំទៅឪពុកម្ដាយទាំងអស់គ្នាផង»។

យ៉ាងណាដំណឹងនេះ អ្នកលេងបណ្តាញសង្គមបានចែករំលែកព្រោងព្រាតដោយបង្ហាញអារម្មណ៍អាណិតអាសូរទៅដល់ក្មេងប្រុសខាងលើ និងក្រុមគ្រួសារនៃសព។
ជាមួយគ្នានោះអ្នកខ្លះក៏មានការងឿងឆ្ងល់ហេតុអ្វីគ្រូពេទ្យដកធ្មេញម្តង៧គ្រាប់ ហើយមិចក៏អាណាព្យាបាលឱ្យគ្រូពេទ្យដកធ្មេញកូនម្តង៧គ្រាប់បែបនេះ។ យ៉ាងណាទាក់ទិននឹងករណីនេះប្រសិនជាមានអ្វី Update នឹងជម្រាបជូនបន្ថែមទៀត៕