ដើមទងនៃនិមិត្តសញ្ញា “ញញឹម (Smiley)” ផ្ដើមចេញពីក្រុមហ៊ុនធានារ៉ាប់រងមួយដែលមានឈ្មោះថា State Mutual Life Assurance (បច្ចុប្បន្ន Hanover Insurance) នៅក្នុងឆ្នាំ១៩៦៣។
ក្រុមហ៊ុននេះបានជួលបុរសម្នាក់ឈ្មោះ Harvey Ross Ball ឱ្យគូរនិមិត្តសញ្ញា “Smiley” នេះឡើង ដើម្បីជាការជំរុញក្រមសីលធម៌របស់បុគ្គលិកនៅក្នុងម៉ោងការងារ។ កាលនោះលោក Harvey បានចំណាយពេលនឹកគិតគូរវាឡើងត្រឹមតែ១០នាទីប៉ុណ្ណោះ ហើយទទួលកម្រៃបាន ៤៥ដុល្លារ (លុយបច្ចុប្បន្នប្រហែល ៣៧៥ដុល្លារ)។
ដោយនឹកស្មានមិនដល់ និមិត្តសញ្ញា “Smiley” បានផ្ទុះប្រជាប្រិយភាពយ៉ាងខ្លាំងនៅពាសពេញពិភពលោក។ យ៉ាងណាមិញ ម្ចាស់ផ្លូវការមិនមែនជាលោក Harvey ឬក៏ជាក្រុមហ៊ុនធានារ៉ាប់រង State Mutual Life Assurance នោះទេ ប៉ុន្តែគឺជាអ្នកសារព័ត៌មានមួយរូបមានសញ្ជាតិបារាំងឈ្មោះថា Franklin Loufrani ទៅវិញ ដែលជាអ្នកបានចុះកម្មសិទ្ធិបញ្ញាជាពាណិជ្ជសញ្ញាផ្ទាល់ខ្លួន។
សព្វថ្ងៃ ក្រុមហ៊ុន Smiley កំពុងស្ថិតនៅក្រោមការគ្រប់គ្រងរបស់កូនលោក Loufrani ដែលមានឈ្មោះថា Nicolas។ ចំណូលក្រុមហ៊ុន Smiley ហក់ដល់ខ្ទង់រយលានដុល្លារឯណោះ ដែលបានមកពីការផ្ដល់អាជ្ញាប័ណ្ណឲ្យក្រុមហ៊ុនធំៗជាច្រើនដូចជា Levi’s, Mars, Zara និង Fendi ជាដើម (ទិន្នន័យឆ្នាំ២០១៦ រកបានជាង ២១៨លានដុល្លារ)៕
ប្រភព៖ CNBC
