អាមេរិកទទួលស្គាល់ថា វត្ថុចម្លែកហោះលើដែនអាកាសមិនពាក់ព័ន្ធនឹងចិន

សហរដ្ឋអាមេរិក ៖ រដ្ឋាភិបាលអាមេរិកបញ្ជាក់ថា វត្ថុចម្លែកហោះលើដែនអាកាសចំនួន៣ ហើយត្រូវបានបាញ់ធ្លាក់នោះ មិនបង្កគ្រោះថ្នាក់ដល់សន្តិសុខរបស់អាមេរិកទេ ហើយក៏មិនពាក់ព័ន្ធនឹងប្រទេសចិនដែរ ។

អ្នកនាំពាក្យក្រុមប្រឹក្សាសន្តិសុខជាតិអាមេរិកប្រចាំសេតវិមាន លោក John Kirby បង្ហាញថា គ្មានអ្វីកំណត់ថា វត្ថុទាំង៣ ដែលត្រូវបានកងទ័ពអាមេរិកបាញ់រហូតផ្ទុះកណ្តាលអាកាសកាលពីសប្តាហ៍កន្លងមក ពាក់ព័ន្ធនឹងចិន ប៉ុន្តែអាចពាក់ព័ន្ធនឹងការវិភាគ និងពាណិជ្ជកម្ម ដូច្នេះ វាគ្មានគ្រោះថ្នាក់ទេ ។

លោក John Kirby ថ្លែងបន្តថា វាជារឿងពិបាកក្នុងការសន្និដ្ឋានសរុបថា វត្ថុទាំងនេះមកពីប្រភពណា ដែលវាត្រូវបានគេបំផ្លាញលើដែនអាកាសរដ្ឋអាឡាស្កា រដ្ឋមីឈីហ្គែន និងប្រទេសកាណាដា គឺទាល់តែរកឃើញកម្ទេចរបស់វា ហើយយកទៅវិភាគ ទើបដឹងច្បាស់ ។ ទោះយ៉ាងណា អាមេរិកមិនអាចបញ្ជាក់ច្បាស់ថា វត្ថុទាំង៣នេះជាផ្នែកមួយនៃគម្រោងស៊ើបការណ៍របស់ចិនទេ ។

ជាមួយគ្នានេះ លោក John Kirby បញ្ជាក់ថា អាមេរិកមិនធ្លាប់បញ្ជូនបាឡុងស៊ើបការណ៍ទៅប្រទេសចិនទេ ខណៈចិនចោទប្រកាន់ថា អាមេរិកបានបង្ហោះបាឡុងជាង១០ឯណោះទៅឈ្លានពានដែនអាកាសរបស់ខ្លួនដោយគ្មានការអនុញ្ញាត ។

ទោះយ៉ាងណា ទាំងមន្ត្រីអាមេរិក និងកាណាដា មិនទាន់អាចប្រមូលកម្ទេចកម្ទីវត្ថុនេះបានទេ ដោយសារវាធ្លាក់នៅឆ្ងាយ ហើយពិបាកចូលទៅដល់ ។ រីឯចិនវិញក៏ធ្លាប់បដិសេធរឿងបាឡុងដែលគេចោទថា លួចស៊ើបការណ៍នៅអាមេរិក ដោយចិននិយាយ បាឡុងដំបូងដែលអាមេរិកបាញ់ធ្លាក់នោះ ជាបាឡុងពិនិត្យអាកាសធាតុដែលហោះចេញក្រៅប្រទេសដោយចៃដន្យប៉ុណ្ណោះ ។

សារព័ត៌មានអាមេរិករាយការណ៍ថា ភ្នាក់ងារស៊ើបការណ៍សម្ងាត់អាមេរិកបានតាមដានបាឡុងចិន តាំងពីចិនបង្ហោះចេញពីកោះហៃណាន ស្ថិតនៅឆ្នេរខាងត្បូងប្រទេសចិនកាលពីដើមខែកុម្ភៈ បន្ទាប់មក វាបានហោះសំដៅទៅកាន់កោះហ្គាំ និងហាវ៉ៃ មុននឹងមកកាន់ដែនអាកាសរដ្ឋអាឡាស្កា ៕ ប្រភព ៖ TNN World