កាលពីចន្លោះឆ្នាំ១២៩៩ ដល់១៩២២ ប្រទេសតួកគីធ្លាប់ជាចក្រភពដ៏អស្ចារ្យមួយ ដែលបានលេចធ្លោអស់រយៈពេល៦៣២។
គ្រានោះតួកគី មានចក្រភពមួយឈ្មោះថា ចក្រភពអូតូម៉ង់ (Ottoman) ដែលបានបង្កើតឡើងដោយមេដឹកនាំកុលសម្ព័ន្ធតួកគីឈ្មោះថា អស់ ស្មិន (Osman 1) នៅលើទឹកដី អែន ណា តូ លា(Anatolia) ក្នុងឆ្នាំ១២៩៩។
ក្រោយមកនៅក្នុងឆ្នាំ១៤៥៣ ស្តេច មើស មេតទី២(Mehmed II) នៃចក្រភពអូតូម៉ង់ បានវាយដណ្តើមកាន់កាប់ក្រុងកុងស្តង់ទីណូប ដែលជារាជធានីរបស់ចក្រភព បី ហ្សាន ទីន(Byzantine) ហើយបានប្តូរឈ្មោះមកជាទីក្រុងអ៊ីស្តានប៊ុល និងក្លាយជារាជធានីថ្មីរបស់ចក្រភពអូតូម៉ង់។
មិនយូរប៉ុន្មានចក្រភពអូតូម៉ង់ ក៏បានប្រមូលយកប្រទេសស៊ីរី អារ៉ាប់ ប៉ាឡេស្ទីន និងអេហ្ស៊ីប មកស្ថិតក្រោមការគ្រប់គ្រងថែមទៀត ដែលធ្វើឱ្យវិសាលភាពនៃចក្រភពមួយនេះកាន់តែខ្លាំងក្លាឡើង។
ពេលនោះ ទឹកដីចក្រភពអូតូម៉ង់បានរីកធំបំផុតដែលមានផ្ទៃដីសរុបជាង ២,២៧លានគីឡូម៉ែត្រការ៉េ លាតសន្ធឹងលើមជ្ឈិមបូព៌ា អឺរ៉ុបខាងកើត និងអាហ្វ្រិកខាងជើង។
តែក្រោយមកដល់ឆ្នាំ១៦០០មក ចក្រភពអូតូម៉ង់ បានអន់ថយសេដ្ឋកិច្ចជាខ្លាំង ក្រោយបដិវត្តន៍ឧស្សហកម្មនៅអង់គ្លេស។ បន្ទាប់មកឆ្នាំ១៨៣០ ដល់ ១៨៧៨ ក្រិច រូម៉ានី ស៊ែប និងប៊ុលហ្គារី បានផ្តាច់ខ្លួនចេញពីចក្រភពអូតូម៉ង់ ដោយប្រកាសឯករាជ្យរៀងៗខ្លួន។
មិនយូរប៉ុន្មានសង្គ្រាមលោកលើកទី១ បានកើតឡើងនៅឆ្នាំ១៩១៤ កងទ័ពអូតូម៉ង់ បានចូលរួមសម្ព័ន្ធមិត្តជាមួយអាល្លឺម៉ង់ និងអូទ្រីស-ហុងគ្រី ប៉ុន្តែសម្ព័ន្ធទាំងនេះ បានចាញ់សង្គ្រាម នៅខែតុលា ឆ្នាំ១៩១៨ ដែលធ្វើឱ្យពួកគេបាត់បង់អំណាច និងទឹកដីស្ទើរតែទាំងស្រុង។
ស្ថានការកាន់តែយ៉ាប់យឺនទៅ ចក្រភពអូតូម៉ង់ ក៏ត្រូវបានបញ្ចប់អាយុកាលត្រឹមឆ្នាំ ១៩២២។ តួកគី ដែលជាអ្នកស្នងតំណែង បានប្រកាសបង្កើតសាធារណរដ្ឋនៅថ្ងៃទី២៩ ខែតុលា ឆ្នាំ១៩២៣៕
ប្រភព៖ History
