កាលពីឆ្នាំ ២០០៦ រដ្ឋាភិបាលយោធាមីយ៉ាន់ម៉ា បានប្រកាសផ្លាស់ប្តូររាជធានីចាស់នៅយុាំងហ្គូន ទៅកាន់តំបន់ជនបទដាច់ស្រយាលមួយឈ្មោះថា ណាយពិដោរ (Naypyidaw) មានចម្ងាយ ៣២០ គីឡូម៉ែត្រពីទីក្រុងចាស់ ដែលបានធ្វើឱ្យពិភពលោកភ្ញាក់ផ្អើលជាខ្លាំង។
មូលហេតុ មួយដែលរដ្ឋាភិបាលយោធាភូមាសម្រេចចិត្តបែបនេះដោយសារ គ្រូទាយតារានិករ បង្គាប់ឱ្យធ្វើការផ្លាស់ប្តូរ។ ដោយឡែកបើយោងទៅតាមហេតុផលវិទ្យាសាស្ត្រ និងក្រសួងធនធានទឹកមីយ៉ាន់ម៉ា បានបង្ហាញឲ្យឃើញថា ទីក្រុងចាស់ ស្ថិតនៅក្រោមកម្រិតនីវ៉ូទឹកសមុទ្រ ចាប់ពី ២,១ ម៉ែត្រ(ទាបបំផុត) និង ៥ ម៉ែត្រ(ខ្ពស់បំផុត) បណ្ដាលឱ្យទីតាំងនោះតែងតែលិចទឹកស្ទើររាល់ឆ្នាំ។
ចំពោះអ្នកវិភាគនយោបាយវិញ យល់ឃើញថាការផ្លាស់ទៅតាំងរដ្ឋធានីនៅ ណាយពិដោរ អាចដោយសារ ទីក្រុងថ្មីស្ថិតនៅចំកណ្ដាលប្រទេស មានភាពងាយស្រួលក្នុងការការពារ ពីការឈ្លានពាននានា ទាំងដីគោក និងផ្លូវទឹក។ ខ្លះថា ណាយពិដោរ ក៏នៅកៀកពីព្រំដែនចិនជាងយុាំងហ្គូនដែរ ទើបរដ្ឋាភិបាលយោធា ដែលមានចិនជាខ្នងបង្អែកធ្វើការផ្លាស់ប្ដូរ។
គួរបញ្ជាក់ថាឈ្មោះប្រទេស “ភូមា” បានផ្លាស់ប្តូរមកជា “មីយ៉ាន់ម៉ា” នៅឆ្នាំ ១៩៨៩ ដែលទទួលស្គាល់ដោយអង្គការសហប្រជាជាតិ និងប្រទេសជាច្រើនលើពិភពលោក៕
ប្រភព៖ Wikipedia