ក្រុមហ៊ុនផ្លូវដែករបស់ប្រទេសស្វីសមួយ បានបំបែកកំណត់ត្រាពិភពលោកសម្រាប់រថភ្លើងដឹកអ្នកដំណើរដែលមានប្រវែងវែងជាងគេបំផុតនៅលើពិភពលោក។ ខ្សែរថភ្លើងនេះ ជាខ្សែរថភ្លើងដែលដឹកអ្នកដំណើរនៅលើផ្លូវដែកដ៏អស្ចារ្យបំផុត កាត់ជួរភ្នំ Alps។
ខ្សែរថភ្លើងដែលទើបតែបំបែកកំណត់ត្រាពិភពលោកនេះមានប្រវែង ១,៩គីឡូម៉ែត្រ ស្ថិតក្រោមប្រតិបត្តិករក្រុមហ៊ុន Rhaetian Railway និងមានទូរថភ្លើងសរុបចំនួន១០០ ធ្វើដំណើរពីតំបន់ Preda ឆ្ពោះទៅកាន់តំបន់ Berguen នៃប្រទេសស្វីស កាត់តាម Albula និង Bernina។
ផ្លូវធ្វើដំណើររបស់ខ្សែរថភ្លើងនេះ ត្រូវបានដាក់បញ្ចូលទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ ក្នុងឆ្នាំ ២០០៨ដោយឆ្លងកាត់ផ្លូវរូងក្រោមដីចំនួន២២ដែលខ្លះបត់តាមភ្នំនិងឆ្លងកាត់ស្ពានចំនួន៤៨រួមទាំងផ្លូវកោង Landwasser Viaduct។
ការធ្វើដំណើរតាមរថភ្លើងនៅលើដងផ្លូវដ៏អស្ចារ្យនេះចំណាយពេលជាងមួយម៉ោង។ នាយកផ្លូវដែកនៃក្រុមហ៊ុន Rhaetian Railway លោក Renato Fasciati បាននិយាយថា ការប៉ុនប៉ងកំណត់ត្រានេះ គឺមានគោលបំណងបង្ហាញពីសមិទ្ធផលផ្នែកវិស្វកម្មមួយចំនួនរបស់ប្រទេសស្វីស និងក៏ដើម្បីអបអរសាទរខួប១៧៥ឆ្នាំនៃផ្លូវដែករបស់ប្រទេសស្វីសផងដែរ៕
ប្រភព៖ Euro News