ក្បួនរថយន្តរបស់ប្រធានាធិបតីអាមេរិក គឺជាក្បួនធ្វើដំណើរដែលចំណាយថ្លៃជាងគេ និងតឹងរឹងជាងគេបំផុតនៅក្នុងពិភពលោក ដោយមានរថយន្តយ៉ាងតិច៥០គ្រឿង និងប៉ូលិសមិនតិចជាង១០០នាក់ ធ្វើដំណើរអមក្បួនរថយន្តនេះ។ សម្រាប់ ក្រុមក្បួននេះមានកាត្វកិច្ចតែមួយគត់គឺ “ធ្វើគ្រប់យ៉ាង ឱ្យតែប្រធានាធិបតីនៅមានជីវិត។”
រថយន្តរបស់ប្រធានាធិបតីអាមេរិក មានឈ្មោះថា The Beast។ សម្រាប់រថយន្តដែលលោកចូ បៃដិន នាំយកមកកម្ពុជាយើងមានឈ្មោះថា The Beast 2.0 ដោយបានបំពាក់ស្លាកលេខ ៤៦ ដើម្បីតំណាងឱ្យការឡើងធ្វើជាប្រធានាធិបតីអាមេរិកទី៤៦។
The Beast មានតម្លៃ ១.៥លានដុល្លារ ដែលបំពាក់មកជាមួយទ្វារកម្រាស់ ២០សង់ទីម៉ែត្រ និងកញ្ចក់ដែលអាចបញ្ឈប់គ្រាប់កាំភ្លើងកម្រិត ៤៤មីលីម៉ែត្របានថែមទៀត។ ដោយឡែក បាតរថយន្តវិញ អាចការពារប្រធានាធិបតីពីគ្រាប់បែកដៃ និង គ្រាប់បែកដែលបោះចូលក្រោមរថយន្តបាន សូម្បីតែគ្រាប់រថក្រោះ ក៏មិនអាចបាញ់កម្ទេចបានរថយន្តនេះបានដែរ។
រថយន្តដឹកប្រធានាធិបតីដើម្បីបង្កើនសន្ទុះដល់ ១០០ គីឡូម៉ែត្រក្នុងមួយម៉ោង ត្រូវប្រើពេល ១៥ វិនាទីដោយសុីសាំង ៥៨,៨ លីត្រ។
សម្រាប់ការដឹកជញ្ជូនវិញ រថយន្តនេះ នឹងត្រូវដឹកមកកម្ពុជាតាមរយៈយន្តហោះរដ្ឋាភិបាលអាមេរិកអមជាមួយយុទ្ធចម្បាំង និងមានកិច្ចការពារ ២៤ម៉ោងពេញ ដើម្បីធានាសុវត្ថិភាពប្រធានាធិបតី៕
ប្រភព៖ Wikipedia