នៅក្នុងតំបន់អាស៊ានប្រទេសដែលធំជាងគេគឺឥណ្ឌូនេសុី ដែលមានផ្ទៃ ១,៩០៤,៥៦៩ គីឡូម៉ែត្រការ៉េ ហើយក៏ជាប្រទេសដែលមានកោះច្រើនជាងគេផងដែរ ដល់ទៅជាង ១៧០០០កោះ។ ដោយឡែកប្រិយមិត្ត ដែលដឹងឬអត់ថាប្រទេសមួយណាដែលតូចជាងគេក្នុងតំបន់អាសុីអាគ្នេយ៍។
ប្រទេសសិង្ហបុរី គឺជាប្រទេសតូចជាងគេបង្អស់នៅក្នុងតំបន់អាសុីអាគ្នេយ៍។ មានផ្ទៃដី ៧១០,២ គីឡូម៉ែត្រការ៉េ ប្រទេសដែនកោះស្ថិតនៅចុងខាងត្បូងនៃឧបទ្វីបម៉ាឡេ។
ប្រទេសនេះ ត្រូវបានខ័ណ្ឌចែកពីឧបទ្វីបម៉ាឡេ ដោយច្រកសមុទ្រ ចូហរ ដែលនៅខាងជើង និងចែកពីកម្រងកោះរ្យៅ (ឥណ្ឌូនេស៊ី) នៅខាងត្បូង។ សិង្ហបុរីជាមជ្ឈមណ្ឌលហិរញ្ញវត្ថុឈានមុខគេចំណាត់ថ្នាក់លេខបួននៅលើពិភពលោក ដែលដើរតួនាទីយ៉ាងចម្បងក្នុងវិស័យពាណិជ្ជកម្មនិងហិរញ្ញវត្ថុអន្តរជាតិ។ លើសពីនេះទៅទៀត កំពង់ផែសិង្ហបុរីស្ថិតក្នុងចំណោមកំពង់ផែដែលមមាញឹកជាងគេទាំងប្រាំនៅលើពិភពលោក។
ក្នុងចំណោមប្រជាជនជាងប្រាំលាននាក់របស់សិង្ហបុរី មានតែ ២,៩១ លាននាក់ទេដែលជាម្ចាស់ស្រុក មានន័យថា ៤៣% នៃប្រជាជនសិង្ហបុរីមកពីបរទេស។
គួរបញ្ជាក់ផងដែរថា សិង្ហបុរី មានន័យថា បុរីនៃសត្វសិង្ហ។ មានរឿងនិទានតំណាលថា មានស្ដេចមួយអង្គបានជួបព្យុះសង្ឃរាពេលធ្វើដំនើរតាមសំពៅរួចក៏ចូលសុំចតនៅកោះនោះ។ ក្រោយមកស្ដេចនោះក៏បានប្រទះឃើញសត្វមួយក្បាលដែលមានរាងរូវដូចសត្វតោ រួចក៏សន្មត់ដាក់ឈ្មោះកោះនោះថាជាបុរីនៃសត្វសិង្ហ។ តែតាមការសិក្សានាពេលថ្មីៗនេះបានអោយដឹងថា កោះនេះមិនធ្លាប់មានសត្វតោរស់នៅទេ។ សត្វតោនៅក្នុងរឿងនិទាននោះ អាចប្រហែលជាសត្វខ្លាម៉ាឡាយ៉ា៕
ប្រភព: Wikipedia