រាល់ពេលទទួលទានជាតិអាល់កុល ច្បាស់ណាស់ថាមនុស្សជាច្រើនប្រាកដជាស្រវឹង និងវង្វេងស្មារតី ដូច្នេះហើយតែងតែត្រូវបានគេធ្វើការហាមឃាត់នូវការបើកបរ និងធ្វើសកម្មភាពមួយចំនួនដែលអាចបណ្ដាលឲ្យកើតមានគ្រោះថ្នាក់ណាមួយជាយថាហេតុ ។ ជាក់ស្ដែងចំពោះអាហារមួយចំនួន ក៏ត្រូវបានគេធ្វើការហាមឃាត់មិនឲ្យទទួលទានកំឡុងពេលអ្នកទទួលទានជាតិអាល់កុលផងដែរ ព្រោះតែត្រូវបានគេរកឃើញថា វាអាចបណ្ដាលឲ្យកើតមាននូវគ្រោះថ្នាក់ធ្ងន់ធ្ងរចំពោះសុខភាព ។
ថ្ងៃនេះKBN យើងសូមលើកយកនូវអាហារមួយចំនួនដែលត្រូវបានហាមឃាត់មិនឲ្យទទួលទានអំឡុងពេលទទួលទានជាតិអាល់កុលជាដាច់ខាត ៖
- ភេសជ្ជៈប៉ូវកំលាំង
មនុស្សជាច្រើន តែងតែមានទម្លាប់លាយស្រាជាមួយនឹងភេសជ្ជៈប៉ូវកំលាំង ដើម្បីបង្កើនរសជាតិស្រារបស់ពួកគេឲ្យកាន់តែឆ្ងាញ់ និងមិនធ្វើឲ្យងាយស្រវឹង ។ តែយ៉ាងណាមិញ បើយោងទៅតាមការសិក្សាស្រាវជ្រាវនៅសហរដ្ឋអាមេរិក បានបង្ហាញថា ការលាយភេសជ្ជៈប៉ូវកម្លាំងចូលទៅក្នុងស្រាគឺពិតជាមានគ្រោះថ្នាក់ខ្លាំងណាស់ចំពោះសុខភាព ។ ព្រោះវាមិនត្រឹមតែធ្វើឲ្យកើតឡើងនៃកំហាប់ជាតិអាកុលក្នុងឈាមប៉ុណ្ណោះទេ វាក៏បណ្ដាលឲ្យកើតមានការថប់បារម្ភ និងធ្វើឲ្យចង្វាក់បេះដូង ដែលអាចឈានទៅដល់ការគាំងបេះដូងបានយ៉ាងងាយផងដែរ ។
- ផ្លែទុរេន
បើនិយាយអំពីផ្លែទុរេន ច្បាស់ណាស់ថាមនុស្សជាច្រើនប្រាកដជាបានដឹងថាវាមិនស័ក្ដសមក្នុងការទទួលទានជាមួយកូកាកូឡា ឬភេសជ្ជៈដែលមានជាតិហ្គាសឡើយ ។ ជាមួយគ្នានេះផ្លែទុរេន ក៏ត្រូវបានគេហាមឃាត់ក្នុងការទទួលទានជាមួយនឹងភេសជ្ជៈអាល់កុលផងដែរ ដោយទុរេនមានផ្ទុកនូវសារធាតុស្ពាន់ធ័រខ្ពស់ ដែលសារធាតុនេះអាចរំខានដល់អង់ស៊ីមមួយចំនួនដែលបំបែកសារធាតុ aldehydes ក្នុងជាតិអាល់កុលរហូតដល់ 70%។ ដូច្នេះប្រសិនបើអ្នកផឹកស្រាជាប្រចាំជាមួយនឹងផ្លែធុរេននោះ វានឹងធ្វើឲ្យកាត់បន្ថយដំណើរការកម្ចាត់ជាតិពុលចេញពីរាងកាយ និងនាំឱ្យពុលស្រា ជាពិសេស ក្នុងករណីធ្ងន់ធ្ងរអាចឈានដល់ការគំរាមកំហែងដល់អាយុជីវិត និងអាចស្លាប់បានយ៉ាងងាយ ។
- ភេសជ្ជៈដែលមានជាតិកាបូន
អំឡុងពេលផឹកស្រា អ្នកមិនគួរផឹកភេសជ្ជៈដែលមានជាតិកាបូននោះឡើយ នេះក៏ព្រោះតែភេសជ្ជៈជាតិកាបូនអាចធ្វើឲ្យបរិមាណជាតិអាកុលជ្រាប់ចូលទៅក្នុងរាងកាយបានយ៉ាងឆាប់រហ័ស ជាហេតុធ្វើឲ្យអ្នកងាយប្រឈមនឹងបញ្ហានៃការខូចក្រពះ ពោះវៀន និងថ្លើម ។ មិនតែប៉ុណ្ណោះ វាក៏បណ្ដាលឲ្យពិបាកក្នុងការរំលាយអាហារ ព្រមទាំងធ្វើឲ្យអ្នកឆាប់ស្រវឹងថែមទៀតផង ។