ការហែលទឹក ក៏ជាការហាត់ប្រាណល្អមួយសម្រាប់សុខភាពរាងកាយ មិនតែប៉ុណ្ណោះវាក៏ជួយទទួលបានអារម្មណ៍ស្រស់ស្រាយ ផ្ដោតអារម្មណ៍បានល្អ ព្រមទាំងជួយព្យាបាលជំងឺមួយចំនួនថែមទៀតផង ។ ដោយគ្រូពេទ្យជាច្រើនតែងតែធ្វើការណែនាំចំពោះអ្នកជំងឺរបស់ខ្លួនឲ្យឧស្សាហ៍ហែលទឹក ជាពិសេសចំពោះអ្នកជម្ងឺសន្លាក់ ជាដើម… ។
ក្នុងពេលជាមួយគ្នានេះ ប្រាកដណាស់ថាមានមនុស្សជាច្រើនចង់ដឹងថា តើគួរហែលទឹកនៅវេលាណាទើបល្អចំពោះសុខភាពរាងកាយ ?
យ៉ាងណាមិញបើយោងទៅតាមអ្នកជំនាញជាច្រើន បានបង្ហាញឲ្យដឹងថា មនុស្សម្នាក់ៗគួរតែធ្វើការហែលទឹកនៅពេលព្រឹកព្រលឹម ជាពិសេសគឺហែលនៅក្នុងសមុទ្រ ។ នេះក៏ព្រោះតែទឹកសមុទ្រជាកើតមានពីធម្មជាតិ ដែលមានផ្ទុកទៅដោយសារធាតុចិញ្ចឹម និងសារធាតុរ៉ែសំខាន់ៗ ដែលមានតម្លៃសម្រាប់សកម្មភាពប្រចាំថ្ងៃរបស់រាងកាយដូចជា សូដ្យូម ប៉ូតាស្យូម កាល់ស្យូម ម៉ាញ៉េស្យូម ក្លរួ ជាតិដែក ទង់ដែង ស័ង្កសី និងសារធាតុមានប្រយោជន៍ជាច្រើនផ្សេងទៀត ដែលមានប្រសិទ្ធិភាពក្នុងការព្យាបាលជំងឺ ព្រមទាំងមានប្រយោជន៍ដល់រាងកាយផងដែរ ។
- ជួយកាត់បន្ថយភាពតានតឹង
បើយោងទៅតាមការស្រាវជ្រាវជាច្រើនបានបង្ហាញឲ្យដឹងថា ការហែលទឹកនៅពេលព្រឹកព្រលឹម ជាពិសេសគឺនៅក្នុងសមុទ្រ មិនត្រឹមតែជួយធ្វើឲ្យអារម្មណ៍ស្រស់ស្រាយប៉ុណ្ណោះទេ ប៉ុន្តែវាក៏ជួយធ្វើឲ្យអ្នកទទួលបានសុខភាពល្អផងដែរ ។
លើសពីនេះទៅទៀត រលកនៅក្នុងសមុទ្រក៏ប្រៀបបានទៅនឹងម៉ាស៊ីនម៉ាស្សា ដែលជួយសម្រួលរាងកាយទាំងមូលធ្វើឱ្យឈាមរត់បានប្រសើរឡើង បង្កើនចំនួនកោសិកាឈាមក្រហម និងធ្វើឱ្យចង្វាក់បេះដូងមានស្ថេរភាព ថែមទៀតផង។ មិនតែប៉ុណ្ណោះ ការហែលទឹកនៅពេលព្រឹកព្រលឹម ក៏បានក្លាយជាវិធីសាស្រ្តដ៏ល្អឥតខ្ចោះមួយ ក្នុងការជួយព្យាបាលសុខភាពផ្លូវចិត្តបានយ៉ាងមានប្រសិទ្ធភាពបំផុត ។
- ជួយលាងសម្អាតសួត
ការហែលទឹកនៅពេលព្រឹកព្រលឹម ជាពិសេសគឺនៅក្នុងសមុទ្រនោះ វាពិតជាល្អខ្លាំងណាស់សម្រាប់សុខភាពសួតរបស់អ្នក ។ នេះក៏ព្រោះតែជាតិអំបិលដែលមាននៅក្នុងសមុទ្រអាចស្រូបចូលក្នុងខ្លួនបានយ៉ាងងាយស្រួលបំផុត ។ ដូច្នេះហើយនៅពេលហែលទឹកសមុទ្រ អ្នកក៏គួរតែដកដង្ហើមតាមខ្យល់សមុទ្រ ដើម្បីទទួលបានដំណក់មីក្រូទស្សន៍រាប់លាននៃអ៊ីយ៉ុងអវិជ្ជមាន ដែលអាចជ្រាបចូលជ្រៅទៅក្នុង alveoli ចូលទៅលាងសម្អាតសួត និងជួយរំលាយស្លេស ព្រមទាំងធ្វើឱ្យមានសួតមានតុល្យភាពឡើងវិញផងដែរ ជាពិសេសនោះ សម្រាប់អ្នកដែលមានជំងឺហឺត ។
