តៅហ៊ូ ត្រូវបានគេទទួលស្គាល់ជាទូទៅថាសម្បូរទៅដោយវីតាមីន និងសារធាតុចិញ្ចឹមជាច្រើនសម្រាប់រាងកាយ មិនតែប៉ុណ្ណោះ វាក៏ជួយព្យាបាល និងការពារអ្នកពីជំងឺហានិភ័យមួយចំនួនផងដែរ ។ ដោយនៅក្នុងតៅហ៊ូ មានផ្ទុកនូវ វីតាមីនអូមេហ្កា3 , កាល់ស្យូម , ស័ង្កសី , ខ្លាញ់ polyunsaturated ដែលមានសុខភាពល្អជាច្រើន រួមទាំងអាស៊ីតអាល់ហ្វា-លីណូឡេនិច រួមជាមួយនឹងអាស៊ីតអាមីណូសំខាន់ៗជាច្រើនទៀតដែររាងកាយត្រូវការ។
មិនតែប៉ុណ្ណោះ តៅហ៊ូក៏មានសមត្ថភាពក្នុងការជួយកាត់បន្ថយពីជំងឺមួយចំនួនផងដែរ ដូចជា ៖
- ការពារសរសៃឈាមបេះដូង
តៅហ៊ូមានផ្ទុកនូវជាតិIsoflavones ដែលមានសមត្ថភាពក្នុងការជួយកាត់បន្ថយកម្រិតកូឡេស្តេរ៉ូលអាក្រក់ ព្រមទាំងកាត់បន្ថយហានិភ័យនៃជំងឺបេះដូង។ លើសពីនេះប្រូតេអ៊ីន ដែលមាននៅក្នុងតៅហ៊ូ ក៏មានសមត្ថភាពក្នុងការជួយបន្ថយសម្ពាធឈាម ក៏ដូចជាជំងឺសរសៃឈាមបេះដូងផងដែរ ។
- កាត់បន្ថយហានិភ័យនៃជំងឺមហារីក
បើយោងទៅតាមការស្រាវជ្រាវ ដែលបង្ហាញដោយសកលវិទ្យាល័យសុខាភាពសាធារណៈ នៃសកលវិទ្យាល័យDongwu បានបង្ហាញឲ្យដឹងថា សារធាតុgenistein និង isoflavones ដែលមាននៅក្នុងតៅហ៊ូ មានសមត្ថភាពក្នុងការប្រឆាំងនឹងអុកស៊ីតកម្ម ព្រមទាំងរារាំងនូវការលូតលាស់របស់កោសិកាមហារីកបានយ៉ាងល្អ ។
- ការពារជំងឺទឹកនោមផ្អែមប្រភេទទី២
យោងទៅតាមការសិក្សាជាច្រើនបានបង្ហាញឲ្យដឹងថា ប្រសិនជាអ្នកកើតមានជំងឺទឹកនោមផ្អែមប្រភេទទី២ ការទទួលទានតៅហ៊ូជារៀងរាល់ថ្ងៃនោះ សារធាតុចិញ្ចឹម និងប្រូតេអ៊ីនដែលមាននៅក្នុងតៅហ៊ូនឹងជួយឲ្យពួកគេកាត់បន្ថយកម្រិតធ្ងន់ធ្ងរនៃជំងឺទឹកនោមផ្អែមនេះបានយ៉ាងមានប្រសិទ្ធភាព។
- កាត់បន្ថយជំងឹទឹកនោមផ្អែម
សារធាតុ Isoflavones ដែលមាននៅក្នុងតៅហ៊ូ ត្រូវបានគេដឹងថាអាចជួយបង្កើនសារធាតុរ៉ែក្នុងឆ្អឹង ព្រមទាំងជួយកាត់បន្ថយហានិភ័យនៃជំងឺពុកឆ្អឹង បានយ៉ាងមានប្រសិទ្ធភាព ។ មិនតែប៉ុណ្ណោះចំពោះស្រ្ដីដែលអស់រដូវ ការទទួលទានតៅហ៊ូក៏ជួយធ្វើឲ្យសុខភាពស្បូនរបស់ស្រ្ដីមានសុខភាពល្អផងដែរ ។
