ផ្លែម្រះ គឺជាបន្លែមួយប្រភេទដែលមានរសជាតិល្វីង ប៉ុន្តែវាត្រូវបានគេដឹងថាផ្ដល់នូវអត្ថប្រយោជន៍ជាច្រើនចំពោះសុខភាព ព្រមទាំងជួយព្យាបាលជំងឺមួយចំនួនផងដែរ ។ ហើយអ្វីដែលកាន់តែពិសេសជាងនេះទៅទៀតនោះ គឺផ្លែម្រះ ក៏បានផ្ដល់នូវគុណសម្បត្តិមាសជាច្រើនសម្រាប់មនុស្សដែលស្រឡាញ់សុខភាពនិងសម្រស់ មិនអាចធ្វើការរំលងបានផងដែរ ។
ខាងក្រោមនេះគឺជាគុណសម្បត្តិមាសមួយចំនួនចំពោះអ្នកស្រឡាញ់សម្រស់មិនគួរធ្វើការរំលង ៖
- ជួយឲ្យស្បែកភ្លឺថ្លា
ផ្លែម្រះ ត្រូវបានគេដឹងថាវាមានសមត្ថភាពក្នុងការជួយបំបាត់នូវស្នាមអុចខ្មៅនៅលើស្បែក កាត់បន្ថយស្នាមមុន ជួយអោយស្បែកមានសុខភាពល្អ បង្កើនប្រព័ន្ធការពារសម្រាប់ស្បែកងាយប្រតិកម្ម ព្រមទាំងជួយកាត់បន្ថយភាពជ្រីវជ្រួញនៅពេលអាយុកាន់តែច្រើនបានយ៉ាងមានប្រសិទ្ធផងដែរ។
ជាមួយគ្នានេះសម្រាប់មិត្តនារីដែលចង់បានស្បែកសស្អាត គ្មានស្នាមជ្រួញ និងស្នាមអុចខ្មៅ ត្រូវបានគេណែនាំឱ្យផឹកទឹកផ្លែម្រះច្របាច់ថ្មីៗ ដោយអាចបន្ថែមនូវទឹកឃ្មុំ ឬស្ករសបន្តិចដើម្បីឱ្យវាកាន់តែងាយស្រួលលក្នុងការទទួលទាន។
- ជួយបំបាត់ការរលាកស្បែក
លក្ខណៈសម្បត្តិមួយដែលត្រូវបានគេចាត់ទុកថាជាចំណុចដ៏លេចធ្លោបំផុតរបស់ផ្លែម្រះនោះគឺ ការជួយព្យាបាលស្បែកដែលរលាកដោយសារកំដៅថ្ងៃ ។ នេះក៏ព្រោះតែម្រះគឺជាបន្លែមួយប្រភេទ ដែលផ្តល់នូវភាពត្រជាក់ និងសំណើមខ្ពស់ដល់ស្បែក។ មិនតែប៉ុណ្ណោះវាក៏មានសមត្ថភាពក្នុងការជួយឱ្យស្បែកដែលរលាកដោយពន្លឺថ្ងៃត្រូវបានស្ដារឡើងវិញ។
ជាមួយគ្នានេះសម្រាប់ស្ត្រីដែលមានបញ្ហាស្បែករលាកដោយសារកំដៅថ្ងៃ ក៏ត្រូវបានគេណែនាំអោយយកផ្លែម្រះហាន់ជាចំណិតៗ បន្ទាប់មកយកទៅស្ងោរក្នុងទឹកដាំពុះប្រហែល ១៥ នាទី រួចទុកឲ្យត្រជាក់។ បន្ទាប់មក យកវាកិនឲ្យម៉ដ្ឋហើយលាយជាមួយនឹងទឹកដែលមានសីតុណ្ហភាពធម្មតា។ បន្ទាប់មកបិទ ឬស្រ្កាប់ត្រង់កន្លែងដែលរលាកទាំងនោះ ធ្វើបែបនេះប្រហែល៣ទៅ៧ថ្ងៃអ្នកនឹងទទួលបានលទ្ធផលដែលនឹកស្មានមិនដល់។
