ភ្នំពេញ៖ និយាយដល់ឈ្មោះ ប៊ុត សីហា ប្រិយមិត្តច្បាស់ជានឹកឃើញភ្លាមថា រូបលោក ជាម្ចាស់ជយលាភីឯកកម្មវិធីប្រឡងចម្រៀងលំដាប់ថ្នាក់ពិភពលោក The Voice Cambodia រដូវកាលទី១។ នៅគ្រានោះ សីហា ទទួលបាននូវប្រជាប្រិយភាព និងសន្ទុះនៃការគាំទ្រយ៉ាងផុសផុល។
ក្រោយកាន់តំណែងម្ចាស់ជយលាភីកម្មវិធីចម្រៀងលំដាប់ពិភពលោក ប៊ុត សីហា មួយរយៈ ស្រាប់តែរូបគេ ទទួលរងនូវរឿងអា,,ស្រូវកក្រើកសង្គមសិល្បៈ ពាក់ព័ន្ធនឹងបញ្ហាគ្រឿងញៀន រហូតធ្វើឱ្យបាត់មុខពីអាជីពអ្នកចម្រៀង។
ទោះយ៉ាងណា ថ្មីៗនេះ ប៊ុត សីហា បានប្រកាសត្រឡប់មកជាថ្មី និងបានសុំការផ្ដល់ឱកាសពីមហាជនដោយអះអាងថា បានកែខ្លួន និងដើរលើផ្លូវល្អត្រឹមត្រូវវិញ។ វត្តមានរបស់ប៊ុត សីហា ត្រឡប់មកវិស័យសិល្បៈវិញនេះ ឃើញថា នៅតែមានសន្ទុះនៃការគាំទ្រខ្លាំងស្ទើរមិននឹកស្មានដល់។
ជាមួយគ្នានេះដែរក្រោយពីលោក ប៊ុត សីហា ប្រកាសកែខ្លួនហើយនោះ ស្រាប់តែមុននេះបន្តិចអ្នកឧកញ៉ា ឡេង វ៉ាត់ត្រា បានបង្ហោះសារមួយនៅលើបណ្ដាញសង្គមហ្វេសប៊ុកដោយមានខ្លឹមសារយ៉ាងដូច្នេះថា៖ «ខ្ញុំសុំកោតសរសើរនូវសន្ដានចិត្តលោកគ្រូ ដែលមានបំណងចង់ជួយជ្រោមជ្រែងមនុស្សដែល ធ្លាប់មានកំហុស និងកែប្រែដើម្បីអនាគតថ្មី។ សម្រាប់ខ្ញុំមិន មានទោមនស្សទេ កន្លងទៅពេលដែលបើកក្រុមហ៊ុនដំបូង លោកយឹមតាស្រង់ដែលជាអ្នកគ្រប់គ្រងបានទាក់ទងមនុស្សពីនាក់គឺ តន់ ចាន់សីម៉ា និង ប៊ុត សីហា ។ ហើយណាត់គាត់ជួប ប៉ុន្តែប្អូន ប៊ុត សីហា គាត់បែរជាមិនគោរពពេលវេលាមកជួប។ ហើយក្រុមហ៊ុនក៏សម្រេច មិនចរចាជជែកគ្នាទៀត តែយ៉ាងណាក៏ដោយពេលនេះ បើសិនជាពុកម៉ែបងប្អូនគាំទ្រ ឲ្យខ្ញុំបាទ ផ្ដល់ឱកាសឲ្យគាត់ ខ្ញុំនឹងផ្ដល់ឱកាសគាត់ តែត្រូវសួរគាត់សិនថាគាត់ចង់ឬអត់? ទោះបីជាក្រុមហ៊ុនព្រមទទួលក៏ប៉ុន្តែដាច់ខាតកុំអោយលើសខ្សែបន្ទាត់ខ្សែក្រហម ត្រូវតែគោរពវិន័យនិង លក្ខន្តិកៈរបស់ក្រុមហ៊ុន ហើយក៏សូមឱ្យបងប្អូនទាំងអស់គ្នាធ្វើជាសាក្សីផង សំណេរខ្ញុំនេះក៏អាចជាភស្តុតាងមួយ កុំឱ្យអ្នកដែលចង់ជួយទៅជាអ្នកដែលមានកំហុស។ ព្រោះអ្នកជោគជ័យនីមួយៗមិនមែនមានត្រឹមតែ អ្វីដែលជាពីរកំណើតទាំងអស់នោះទេ ត្រូវតែពង្រឹងសមត្ថភាពបន្ថែមគ្រប់ផ្នែក ទើបអាចឈរជើងបាន» ៕
