កីឡាការិនី Brittney Griner តារាបាល់បោះនិងម្ចាស់មេដាយមាសអូឡាំពិកអាមេរិក ត្រូវបានតុលារការនៃប្រទេសរុស្សុីកាត់ទោសអោយជាប់ពន្ធធនាគាររយៈពេល៩ឆ្នាំ ពីបទជួញដូរគ្រឿងញៀន។
រឿងហេតុនេះកើតតាំងពីខែកុម្ភៈដើមឆ្នាំ២០២២នេះម្ល៉េះ ដោយកាលនោះ Brittney Griner បានធ្វើដំណើរទៅរុស្ស៊ី ដើម្បីទៅលេងឱ្យក្លឹបអាជីពរបស់ខ្លួន UMMC Ekaterinburg ។ ទៅដល់ព្រលានយន្តហោះ ស្រាប់តែគេឆែកឃើញក្នុងវ៉ាលីរបស់នាង មាន Vape ១ដើមនិងទឹកថ្នាំ ទើបបណ្ដាលឱ្យមានការចាប់ខ្លួន និងបទចោទប្រកាន់លើរូបនាងថាជួញដូរគ្រឿងញៀន។
សេចក្ដីសម្រេចដាក់ទោសនេះរហូតដល់៩ឆ្នាំនេះ បានធ្វើអោយប្រធានាធិបតី Joe Biden ផ្ទុះកំហឹងជាខ្លាំង ដោយលោកបានលើកឡើងថា “រុស្ស៊ីកំពុងឃុំខ្លួន Brittney ខុស។ វាមិនអាចទទួលយកបានទេ ហើយខ្ញុំសូមអំពាវនាវឱ្យរុស្ស៊ីដោះលែងនាងជាបន្ទាន់។” លោកក៏បានសង្កត់ទៀតថា នឹងស្វែងរកវិធីជួយនាងអោយបានផងដែរ។”
គួរបញ្ជាក់ផងដែរថា Brittney Griner គឹជាកីឡាការនីឆ្នើមមួយរូប ដែលធ្លាប់ជួយអោយអាមេរិកឈ្នះមេដាយមាសអូឡាពិក៕
ប្រភព: CNN
