Celery សេលីរី គឺជាបន្លែមួយប្រភេទ ដែលសម្បូរទៅដោយសារធាតុចិញ្ចឹមជាច្រើនសម្រាប់រាងកាយ ជាពិសេសវាក៏មានឥទ្ធិពលលើការថែរក្សាស្បែកបានយ៉ាងល្អផងដែរ ។ ក្រៅពីនេះ សេលីរីក៏មានរសជាតិឆ្ងាញ់ ផ្តល់សំណើមខ្ពស់ដល់រាងកាយ ព្រមទាំងផ្ដល់នូវការរំលាយអាហារ ក៏ដូចជាជួយព្យាបាលបញ្ហារលាកបានយ៉ាងល្អផងដែរ ។
ដូច្នេះថ្ងៃនេះKBN បានលើកយកនូវគុណប្រយោជន៍ជាច្រើនរបស់ សេលីរីមកធ្វើការចែករំលែកចំពោះប្រិយមិត្តគ្រប់គ្នា ឲ្យបានដឹងនឹងជ្រាបកាន់តែច្បាស់ពីគុណសម្បត្តិរបស់វាផងដែរ ។ ជាពិសេសសម្រាប់សុភាពនារីទាំងឡាយដែលស្រឡាញ់សុខភាពស្បែក និងសម្រស់មិនគួររំលងឡើយ ។
- កាត់បន្ថយការកើតមុន
សេលីរី មានជាតិស្ករទាប ដូច្នេះវាល្អបំផុតសម្រាប់យកមកជំនួសភេសជ្ជៈដែលមានជាតិស្ករខ្ពស់ដូចជា សូដា កាហ្វេ និងភេសជ្ជៈប៉ូវកម្លាំងផ្សេងទៀត។ ជាមួយគ្នានេះក៏មានការស្រាវជ្រាវមួយបានបង្ហាញថា សេលីរី គឺល្អបំផុតក្នុងការកាត់បន្ថយមុន ដែលត្រូវបានបង្កឡើងដោយរបបអាហារដែលមានជាតិ glycemic ខ្ពស់ផងដែរ ។
ដូច្នេះហើយ ប្រសិនបើអ្នកជ្រើសរើសសេលីរី ជំនួសភេសជ្ជៈដែលមានជាតិស្ករខ្ពស់ នោះអ្នកប្រហែលជានឹងឃើញមានការថយចុះនៃការរលាកដោយសារជាតិស្ករ និងជាតិសរសៃច្រើននៅក្នុងរបបអាហាររបស់អ្នកជាក់ជាមិនខាន ។
- សម្រួលដល់ការបន្ទោរបង់
សេលីរី ត្រូវបានគេដឹងថាសម្បូរទៅដោយជាតិសរសៃ និងវីតាមីនជាច្រើន ដែលល្អចំពោះក្រពះពោះវៀន ព្រមទាំងជួយសម្រួលដល់ការបន្ទោរបង់បានយ៉ាងល្អ ។ ជាងនេះទៅទៀតជាតិសរសៃរលាយដែលមាននៅក្នុង សេលីរី ក៏ជួយគ្រប់គ្រងការរំលាយអាហារដោយការភ្ជាប់ទៅនឹងជាតិពុល និងផលិតផលកាកសំណល់ដែលលើសនៅក្នុងពោះវៀន ហើយបណ្តេញវាចេញពីរាងកាយមុនពេលវាមានឱកាសបង្កការរលាកផងដែរ ។
- ជួយសម្រកទម្ងន់
នៅក្នុងមាតិកាជាតិសរសៃរបស់ សេលីរី ត្រូវបានគេដឹងថា វាជួយឱ្យអ្នកមានអារម្មណ៍ឆ្អែតបានយូរ ដែលជាហេតុនាំឱ្យអ្នកញ៉ាំអាហារដែលមានជាតិស្ករតិច ហើយធ្វើឲ្យអ្នកឆ្អែតបានយូរផងដែរ ។ ដូច្នេះហើយ សេលីរី ត្រូវបានគេជ្រើសរើសធ្វើជាអាហារសម្រាប់អ្នកសម្រកទម្ងន់បានយ៉ាងល្អបំផុត ។
- សម្បូរទៅដោយវីតាមីន និងសារធាតុរ៉ែសំខាន់ៗ
សេលីរី គឺជាប្រភពដ៏ល្អនៃវីតាមីន និងសារធាតុរ៉ែសំខាន់ៗដូចជា ស័ង្កសី វីតាមីន C ប៉ូតាស្យូម ម៉ាញ៉េស្យូម កាល់ស្យូម និងវីតាមីនអា។ដោយទាំងអស់នេះសុទ្ធសឹងតែជាសមាសធាតុដ៏សំខាន់សម្រាប់ស្បែកក្នុងការធ្វើឲ្យស្បែកមានសុខភាពល្អ និងភ្លឺថ្លា។
- ប្រឆាំងនឹងការរលាក
សេលីរី ត្រូវបានគេដឹងថា វាមានលក្ខណៈសម្បត្តិប្រឆាំងនឹងការរលាកល្អបំផុត ដែលកើតចេញពីកម្រិតខ្ពស់នៃ luteolin ។ដោយសារធាតុ Luteolin គឺជាសមាសធាតុដែលមានវត្តមានជាទូទៅនៅក្នុងរុក្ខជាតិដែលត្រូវបានប្រើប្រាស់ជាឱសថបុរាណដើម្បីព្យាបាលរោគសញ្ញាដែលទាក់ទងនឹងការរលាក រួមមានសត្វល្អិតខាំ របួស ការឆ្លងមេរោគផ្សិត រលាក និងជំងឺស្បែកផ្សេងៗទៀត។
- ផ្តល់សំណើម
សេលីរី ត្រូវបានផ្សំឡើងពីទឹក 96% ដែលធ្វើឱ្យវាក្លាយជាអាហារផ្តល់ជាតិទឹកដ៏អស្ចារ្យមួយសម្រាប់រាងកាយ ។ ជាមួយគ្នានេះក៏ត្រូវបានគេដឹងថា ជាតិទឹកដែលមាននៅក្នុងសេលីរី ក៏អាចជួយបណ្តេញជាតិពុល និងផលិតផលកាកសំណល់ចេញពីរាងកាយ ជួយដល់ការរំលាយអាហារឲ្យមានសុខភាពល្អ និងរក្សាតុល្យភាពប្រេងធម្មជាតិរបស់ស្បែកបានយ៉ាងល្អថែមទៀតផង ។
លើសពីនេះ បរិមាណជាតិទឹកខ្ពស់របស់ សេលីរី ក៏មានផ្ទុកទៅដោយសារធាតុអេឡិចត្រូលីត ដែលមានសារៈសំខាន់សម្រាប់រក្សាជាតិទឹក និងជួយឱ្យរាងកាយស្រូបយកជាតិទឹកបានកាន់តែមានប្រសិទ្ធភាពផងដែរ។