ទឹក គឺជាសារធាតុដ៏សំខាន់បំផុតមួយសម្រាប់ការទ្រទ្រង់ជីវិតរបស់មនុស្ស សត្វ និងរុក្ខជាតិលើភពផែនដី។ ដោយទឹកត្រូវបានគេដឹងថា វាមិនត្រឹមតែផ្ដល់នូវការចិញ្ចឹមជីវិតសម្រាប់មនុស្សប៉ុណ្ណោះទេ ប៉ុន្តែវាក៏ផ្ដល់នូវអត្ថប្រយោជន៍ជាច្រើនចំពោះរាងកាយមនុស្ស ក៏ដូចជាជួយក្នុងការព្យាបាលជំងឺជាច្រើនផងដែរ ។
ដូច្នេះប្រសិនបើអ្នក មិនមែនជាមនុស្សដែលចូលចិត្តផឹកទឹកទេនោះអ្នកគួរតែធ្វើការពិចារណាឡើងវិញ។ ជាមួយគ្នានេះក៏មានមនុស្សជាច្រើន ដែលតែងតែមានចម្ងល់ថា តើគួរទទួលទឹកពេលណាទើបល្អចំពោះរាងកាយ ? ហើយគួរទទួលទានទឹកមុនពេលចូលដំណេកដែរឬទេ?
ហើយខាងក្រោមនេះគឺជាគុណសម្បត្តិ នៃការទទួលទានទឹកមុនពេលចូលដំណេក ៖
- – ជួយគ្រប់គ្រងសីតុណ្ហភាពកាន់តែប្រសើរ
ប្រសិនបើអ្នកតែងតែងងុយគេង ព្រោះតែអាកាសធាតុត្រជាក់ពេក ឬក្តៅពេកក្នុងបន្ទប់គេងនោះ អ្នកគួរតែច្រើសរើសការផឹកទឹកមួយកែវមុនពេលចូលគេង ដើម្បីជួយគ្រប់គ្រងសីតុណ្ហភាពក្នុងខ្លួនរបស់អ្នក ។
ជាមួយគ្នានេះ បើយោងទៅតាមមជ្ឈមណ្ឌលគ្រប់គ្រង និងការពារជំងឺបានឲ្យដឹងថា ការផឹកទឹកមុនពេលចូលគេងមិនត្រឹមតែជួយរក្សាសីតុណ្ហភាពរាងកាយក្នុងកម្រិតធម្មតាប៉ុណ្ណោះទេ ប៉ុន្តែវាក៏ជួយការពាររាងកាយអ្នកពីការខ្សោះជាតិទឹក ពេលក្រោកពីដំណេកផងដែរ ។
- – ជួយឲ្យស្បែកភ្លឺថ្លា
ដើម្បីទទួលបានស្បែកភ្លឺថ្លា បន្ទាប់ពីភ្ញាក់ពីដំណេកនោះ អ្នកគួរតែទទួលទានទឹកមួយកែវមុនពេលចូលគេង។ មិនត្រឹមតែប៉ុណ្ណោះវាក៏ជួយការពាររាងកាយអ្នកពីការខ្វះជាតិទឹក , ខ្មៅស្រអាប់ ក៏ដូចជាយារធ្លាក់ផងដែរ ។ យល់ល្អអ្នកក៏គួរតែទទួលទានទឹកពេលថ្ងៃឲ្យបានកាន់តែច្រើនផងដែរ ចន្លោះពី២ទៅ៣លីត្រ ។
– ដង្ហើមដកកាន់តែងាយស្រួល
ចំពោះអ្នកដែលមានជំងឺហឺត ឬរោគសញ្ញាអាឡែហ្ស៊ី ពិបាកក្នុងការដកដង្ហើមពេលគេងនោះ អ្នកគួរតែព្យាយាមទទួលទានទឹកមួយកែវមុនពេលចូលគេង ។ ដោយនៅពេលគេង រាងកាយនឹងមានការខ្សោះជាតិទឹក ដែលធ្វើឲ្យផ្លូវដង្ហើមរួមតូច នឹងនាំឱ្យពិបាកដកដង្ហើម។ ដូច្នេះការទទួលទានទឹក វានឹងធ្វើឲ្យផ្លូវដង្ហើមរបស់អ្នកដំណើរការបានល្អ ក៏ដូចជាដកដង្ហើមបានស្រួលផងដែរ ។
– កាត់បន្ថយភាពតានតឹងនៃបេះដូង
ការទទួលទានទឹកបានគ្រប់គ្រាន់ គឺជាវិធីសាមញ្ញមួយដើម្បីជួយរក្សាបេះដូងរបស់អ្នកឱ្យមានសុខភាពល្អ។ ដោយបេះដូងតែងតែធ្វើការបូមឈាមទៅរាងកាយទាំងមូល ដូច្នេះប្រសិនបើរាងកាយរបស់អ្នកមានទឹកគ្រប់គ្រាន់ នោះវានឹងធ្វើឲ្យការបូមឈាមរបស់អ្នកកាន់តែងាយស្រួល។ ទន្ទឹមនឹងនោះការទទួលទានរបបអាហារដែលផ្តល់ឲ្យសុខភាពបេះដូង និងការផឹកទឹកគ្រប់គ្រាន់ពេញមួយថ្ងៃក៏បានគាំទ្រដល់បេះដូងរបស់អ្នក និងសរីរាង្គសំខាន់ៗដទៃទៀតឲ្យដំណើរការកាន់តែប្រសើរផងដែរ ។