រដ្ឋធានីគៀវ៖ រហូតមកដល់ពេលនេះ សង្គ្រាមឈ្លានពានរបស់ប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) បានអូសបន្លាយ អស់រយៈពេល១៥៩ថ្ងៃកន្លងមកហើយ គិតត្រឹមថ្ងៃទី១ ខែសីហា ហើយការវាយប្រយុទ្ធគ្នា កំពុងតែបន្ដ កាន់តែមានសភាពខ្លាំងក្លាឡើង ប៉ុន្ដែនៅពេលនេះ អ៊ុយក្រែន បានអះអាងថា កងទ័ពរបស់ខ្លួន បានប្រើប្រាស់ប្រព័ន្ធបាញ់គ្រាប់រ៉ុក្កែតហ៊ីម៉ាស (HIMARS) របស់សហរដ្ឋអាមេរិក វាយប្រហារកម្ទេចរថភ្លើងពិសេសរបស់រុស្ស៊ី ដឹកកងទ័ព និង គ្រឿងសឹក នៅក្នុងតំបន់ឃើរសុន (Kherson) ។
សារព័ត៌មាន Ukrinform បានចេញផ្សាយ កាលពីថ្ងៃទី៣១ ខែកក្កដា ថា អ៊ុយក្រែន កាលពីរាត្រី ថ្ងៃទី៣០ បានប្រើប្រាស់ប្រព័ន្ធបាញ់រ៉ុក្កែតហ៊ីម៉ាស កម្ទេចរថភ្លើងពិសេស ដឹករថយន្ដចំនួន៤០គ្រឿង រួមជាមួយនឹងកងទ័ព សម្ភារយោធា និង គ្រឿងយុទ្ធោបករណ៍ ខណៈបានចេញពីឧបទ្វីបគ្រីមៀ ធ្វើដំណើរ មកដល់ស្ថានីយប្រ៊ីលីវកា (Brylivka) តំបន់ឃើរសុន (Kherson) ស្ថិតនៅភាគខាងត្បូង ប្រទេសអ៊ុយក្រែន។
លោក ស៊ើហ៊ីអ៊ី ប្រាតចុក (Serhii Bratchuk) អ្នកនាំពាក្យ ប្រធានតំបន់ប្រតិបត្ដិការសឹក ប្រចាំតំបន់អូដេសា បានបញ្ជាក់ នៅលើបណ្ដាញសង្គមតេឡេក្រាម ថា «ការវាយប្រហារពីកាំភ្លើងផ្លោងហ៊ីម៉ាសរបស់កងទ័ពអ៊ុយក្រែន បានសម្លាប់ទាហានរុស្ស៊ី ចំនួន៨០នាក់ និង របួស២០០នាក់។
បើតាមទិន្នន័យស៊ើបការណ៍សម្ងាត់ បានបញ្ហាញថា អ្នកបើកបររថភ្លើង និង វិស្វករផ្នែកផ្លូវដែករុស្ស៊ី ទាំងអស់ ត្រូវបានសម្លាប់។ ប៉ុន្ដែបើគិតចាប់តាំងពីការផ្ទុះសង្គ្រាមឈ្លានពាន កាលពីថ្ងៃទី២៤ ខែកុម្ភៈ ឆ្នាំ ២០២២ រហូតមកដល់ថ្ងៃទី ៣១ ខែកក្កដា ឆ្នាំ ២០២២ រុស្ស៊ី បានខាតបង់កម្លាំងទាហាន នៅសមរភូមិ ក្នុងប្រទេសអ៊ុយក្រែន សរុបប្រហែល ៤០ ៨៣០ នាក់៕