រដ្ឋធានីប៉េកាំង៖ ដោយសារតែការរឹតបន្ដឹងនូវវិធានការ ទប់ស្កាត់នឹងវិបត្ដិជំងឺកូវីដ ទើបធ្វើឲ្យប៉ះពាល់យ៉ាងខ្លាំង ដល់សេដ្ឋកិច្ចដ៏ធំបំផុត លំដាប់លេខ២របស់ពិភពលោក ហើយរដ្ឋាភិបាលក្រុងប៉េកាំង បានបង្ហាញសញ្ញាថា ចិននឹងមិនអាចសម្រេចបាន តាមគោលដៅ នៃកំណើនសេដ្ឋកិច្ច ប្រចាំឆ្នាំរបស់ខ្លួននោះឡើយ។
សារព័ត៌មាន Market Watch បានចេញផ្សាយ កាលពីថ្ងៃព្រហស្បតិ៍ ទី២៨ ខែកក្កដា ថា មេដឹកនាំទាំងអស់របស់ចិន បានទទួលស្គាល់ថា នៅឆ្នាំនេះ ក្រុងប៉េកាំង នឹងមិនអាចសម្រេចតាមគោលដៅកំណើនសេដ្ឋកិច្ច ប្រចាំឆ្នាំរបស់ខ្លួន។ នេះជាសញ្ញាបង្ហាញថា ចិននឹងបន្ដធ្វើដំណើរឆ្ពោះ ទៅរកការរឹតបន្ដឹង ដើម្បីទប់ស្កាត់ជំងឺកូវីដ-១៩ ហើយបន្ដចាត់វិធានការយ៉ាងប្រុងប្រយ័ត្នបំផុត សម្រាប់ជួយទ្រទ្រង់ដល់ទីផ្សារអចលនទ្រព្យរបស់ខ្លួន ដែលកំពុងតែប្រឈមមុខនឹងការរង្គោះរង្គើ ដោយសារវិបត្ដិសាច់ប្រាក់។
ការិយាល័យនយោបាយរបស់ចិន ដែលជាស្ថាប័នបង្កើតគោលនយោបាយកំពូលរបស់បក្សកុម្មុយនិស្ត បានបញ្ជាក់ នៅក្នុងសេចក្តីថ្លែងការណ៍មួយ កាលពីថ្ងៃព្រហស្បតិ៍ ក្រោយកិច្ចប្រជុំសេដ្ឋកិច្ច ប្រចាំត្រីមាសរបស់ខ្លួន ថា ក្រុងប៉េកាំង នៅតែមានគោលបំណង ចង់រក្សាកំណើនសេដ្ឋកិច្ចរបស់ខ្លួន ឱ្យដំណើរការឆ្ពោះទៅមុខ «នៅក្នុងល្បឿនដ៏សមស្របមួយ» នៅក្នុងឆមាសទី២ នៃឆ្នាំ២០២២។ ជាមួយគ្នានេះ រដ្ឋាភិបាល ក៏បានជំរុញដល់បណ្ដាខេត្តនានា ឲ្យបង្កើននូវកិច្ចខិតខំប្រឹងប្រែងជាមុន ដើម្បីបំពេញតាមគោលដៅកំណើនសេដ្ឋកិច្ច ប្រចាំឆ្នាំរបស់ខ្លួន។
ទោះជាយ៉ាងណា សេដ្ឋវិទូមួយចំនួនតូច រំពឹងថា ប្រទេសចិន នឹងសម្រេចបាននូវគោលដៅផ្លូវការរបស់ខ្លួន នៅក្នុងការពង្រីកផលិតផលក្នុងស្រុកសរុប ហៅកាត់ GDP ប្រហែល ៥,៥ភាគរយ នៅឆ្នាំ២០២២ ជាពិសេស ក្រោយពេលរដ្ឋាភិបាលក្រុងប៉េកាំង បានប្រកាស អំពីកំណើនសេដ្ឋកិច្ច នៅក្នុងត្រីមាសទី២ ត្រឹមតែ ០,៤ភាគរយ បើធៀបនឹងឆ្នាំ២០២១៕
