កំពូលខ្សែប្រយុទ្ធរបស់ក្រុម PSG និងជម្រើសជាតិប្រេសុីល កីឡាករ Neymar da Silva Santos Júnior នឹងត្រូវឡើងតុលារនៅថ្ងៃទី ១៧ ខែតុលា ឆ្នាំ២០២២ខាងមុខ នៅទីក្រុង Barcelona ប្រទេសអេស្ប៉ាញ។
ការឡើងតុលារការនេះក៏ព្រោះតែការជាប់ពាក់ព័ន្ធរឿងគេចមិនព្រមបង់ពន្ធនៅអំឡុងពេល ដែល Neymar បានផ្លាស់មកពីក្រុម Santos មកចូលរួម Barcelona កាលពីឆ្នាំ២០១៣។ 
Neymar ត្រូវបានគេដឹងថាបានគេចពន្ធក្នុងទំហំទឹកប្រាក់ប្រមាណជាង ៨.៤លានដុល្លារ ដែលអាចឲ្យអាជ្ញាធរពន្ធដារអាចនឹងដាក់ទោសក្នុងពន្ធនាគារ ២ឆ្នាំ និងពិន័យជាប្រាក់ប្រមាណ ១០លានដុល្លារ ប្រសិនបើរកឃើញការពិត។
មិនតែប៉ុណ្ណោះ ក្រុមហ៊ុន DIS ដែលជាក្រុមហ៊ុនរក្សាសិទ្ធ៤០% លើ Neymar កាលគេលេងនៅក្លឹប Santos ដោយក្រុមហ៊ុននេះបានចោទប្រកាន់ Neymar ក្រុមគ្រួសាររបស់គេ និងលោក Sandro Rosell ព្រមទាំងលោក Josep Maria Bartomeu ដែលជាអតីតប្រធានក្លឹប Barcelona ថាពួកគេបានរួមគ្នាបន្លំថ្លៃដោះដូរកីឡាករនេះ មិនចង់បង់ថ្លៃពេញឲ្យក្រុមហ៊ុនរបស់គេ។
លើសពីនេះទៅទៀតក្រុមហ៊ុននេះ ចង់ដាក់ Neymar នៅក្នុងពន្ធនាគារដល់ទៅ ៥ឆ្នាំ ជាមួយប្រាក់សងជំងឺចិត្ត១៥០លានដុល្លាឯណោះ។
គួរបញ្ជាក់ផងដែរថា Neymar នឹងឡើងតុលារមុនមួយខែ នៃព្រឹត្តិការណ៍ World Cup 2022 នៅប្រទេសហ្គាតា៕
ប្រភព: MARCA
