រដ្ឋធានីប៉េកាំង៖ នៅក្នុងដំណើរទស្សនកិច្ចដ៏កម្រ នៅក្នុងរដ្ឋធានីប៉េកាំង កាលពីថ្ងៃអង្គារ ទី២៦ ខែកក្កដា នោះ មេដឹកនាំឥណ្ឌូនេស៊ី និង ចិន បានដាក់ចេញនូវផែនការពង្រីកនូវកិច្ចសហប្រតិបត្ដិការជាច្រើនវិស័យ។
សារព័ត៌មានរបស់អាល្លឺម៉ង់ DW បានចេញផ្សាយ កាលពីថ្ងៃទី២៦ ខែកក្កដា ថា លោក ចូកូ វីដូដូ (Joko Widodo) ប្រធានាធិបតីឥណ្ឌូនេស៊ី បានជួបជាមួយនឹងសមភាគីចិន លោក ស៊ី ជិនពីង (Xi Jinping) និង លោក លី កេឈៀង ( Li Keqiang) នាយករដ្ឋមន្រ្ដីចិន។ នៅក្នុងដំណើរទស្សនកិច្ចដ៏កម្ររបស់មេដឹកនាំអាស៊ានរូបនេះ ទាំងភាគីឥណ្ឌូនេស៊ី និង ចិន បានឯកភាពគ្នា ជំរុញឲ្យទំនាក់ទំនងពាណិជ្ជកម្មកាន់តែខ្លាំងក្លាឡើង ក៏ដូចជា បង្កើននូវកិច្ចសហប្រតិបត្តិការ នៅក្នុងវិស័យកសិកម្ម និង សន្តិសុខស្បៀង នៅក្នុងចំណោមបញ្ហាជាច្រើនផ្សេងៗទៀត។
ប្រមុខរដ្ឋឥណ្ឌូនេស៊ី បានបញ្ជាក់ថា «ចិន ជាដៃគូយុទ្ធសាស្ត្រដ៏ទូលំទូលាយរបស់ឥណ្ឌូនេស៊ី។ យើងត្រូវតែបំពេញភាពជាដៃគូនេះ ជាមួយនឹងកិច្ចសហប្រតិបត្តិការដ៏មានអត្ថប្រយោជន៍ សម្រាប់ប្រទេសរបស់យើង នៅក្នុងពេលតែមួយ សម្រាប់តំបន់ និង ពិភពលោកទាំងមូល»។
ជាមួយគ្នានេះ ប្រធានាធិបតីចិន លោក ស៊ី ជិនពីង បានបញ្ជាក់ថា លោក Widodo ជាប្រមុខរដ្ឋលើកដំបូងគេ ដែលភាគីចិន បានទទួល បន្ទាប់ពីព្រឹត្តិការណ៍កីឡាអូឡាំពិករដូវរងា នៅទីក្រុងប៉េកាំង។ មេដឹកនាំចិនរូបនេះ ក៏បានសង្កត់ធ្ងន់ថា «ដំណើរទស្សនកិច្ចនេះ គឺគ្រប់គ្រាន់ សម្រាប់បញ្ជាក់ថា តើទំនាក់ទំនង រវាងប្រទេសទាំងពីរ មានភាពស្និទ្ធស្នាលប៉ុនណា»។
ប្រទេសចិន ជាដៃគូពាណិជ្ជកម្មដ៏ធំបំផុតរបស់ឥណ្ឌូនេស៊ី។ ដោយឡែក ការនាំចូលរបស់ចិន ពីប្រទេសឥណ្ឌូនេស៊ី បានកើនឡើង ប្រហែល ១ភាគ៣ នៅក្នុងឆមាសទី១ នៃឆ្នាំ២០២២ បើធៀបនឹងឆ្នាំមុន។
រហូតមកដល់ពេលនេះ ប្រធានាធិបតីឥណ្ឌូនេស៊ី ត្រូវបានគេមើលឃើញថា កំពុងតែរក្សាលំនឹងឥទ្ធិពលនយោបាយ រវាង សហរដ្ឋអាមេរិក ចិន និង រុស្ស៊ី ។ ចំណែកដំណើរទស្សនកិច្ចរបស់មេដឹកនាំអាស៊ានរូបនេះ បានកើតឡើង នៅមុនកិច្ចប្រជុំប្រមុខដឹកនាំ G-20 នៅកោះបាលី ប្រទេសឥណ្ឌូនេស៊ី ចន្លោះពីថ្ងៃទី១៥-១៦ ខែវិច្ឆិកា ខាងមុខនេះ។
នៅក្នុងតួនាទីជាប្រធាន នៃកិច្ចប្រជុំកំពូល G-20 នោះ ប្រធានាធិបតីឥណ្ឌូនេស៊ី លោក Widodo កាលពីពេលថ្មីៗនេះ បានទៅជួបសមភាគីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) នៅក្នុងរដ្ឋធានីគៀវ ហើយនៅថ្ងៃបន្ទាប់ ក៏បានបន្ដដំណើរទៅជួបសមភាគីរុស្ស៊ី លោក វ៉្លាឌីមៀរ ពូទីន នៅក្នុងរដ្ឋធានីមូស្គូ។ មេដឹកនាំឥណ្ឌូនេស៊ី បានត្រៀមខ្លួនរួចជាសម្រេច សម្រាប់ការធ្វើជាស្ពានផ្សារភ្ជាប់ទំនាក់ទំនង ដោះស្រាយជម្លោះ រវាងមេដឹកនាំទាំង២នេះផងដែរ៕
