ភ្នំពេញ៖ លោក ហ៊ុយ យ៉ាឡេង ផលិតករភាពយន្ត និងជាតារាសំដែង បានប្រកាសយកខ្សែភាពយន្ដដែលលោកបានផលិតដោយផ្ទាល់ដៃមានចំណងជើងថា «គ្រោះជីវិតកូវីដ ១៩» ហើយបានផ្លាស់ប្ដូរចំណងជើងវិញថា «សង្រ្គាមអនឡាញ» យកមកចាក់បញ្ចាំងនៅលើគេហទំព័រយូធូប (Youtube) ជាសាធារណៈ ក្រោយបរាជ័យក្នុងការចាក់បញ្ចាំងនៅតាមរោងភាពយន្ដគ្រប់បណ្ដាខេត្ត ក្រុង ដែលនាំឲ្យខាតបង់ប្រាក់ចណូលរាប់ម៉ឺនដុល្លារ។
ផលិតករ និងជាតួឯកក្នុងខ្សែភាពយន្តខ្មែរល្បីៗដូចជា ដើម្បីកូន វិកលចរិត, ធ្មប់ និងទារុណកម្មខ្មោច លោក ហ៊ុយ យ៉ាឡេង បានបង្ហោះសារនៅលើបណ្តាញសង្គមផ្ទាល់ខ្លួនថា៖ «សង្រ្គាមអនឡាញ ភាពយន្តនេះចាយលុយផលិត៨ម៉ឺនដុល្លារ រកចំណូលពីរោងកុនបានត្រឹម៦ពាន់ដុល្លារតែប៉ុណ្ណោះ ដូចនេះដើម្បីបានថវិការផលិតបន្តរទៀត ខ្ញុំមានតែបង្ហោះភាពយន្តនេះជាសាធារណៈហើយប្តូរចំណងជើងមកជាសង្រ្គាមអនឡាញវិញ ភាពយន្តនេះតាមការសង្កេតទស្សនិកជនមិនទៅមើលព្រោះតែមិនចង់រំឮកឈ្មោះនិងការឈឺចាប់ពីកូវីត១៩ តែតាមពិតភាពយន្តនេះមិនដូច្នោះឡើយ ដើម្បីបង្ហាញអោយបងប្អូនដឹងមានតែចាក់ជូនបងប្អូនជាសាធារណៈ បងប្អូនមើលហើយពេញចិត្តសូមបរិច្ចាកតាមសុធាជ្រាសថ្លា»។
គួររំលឹកដែលថា លោក ហ៊ុយ យ៉ាឡេង ធ្លាប់បានប្រាប់សារព័ត៌មានក្នុងស្រុកពីមូលហេតុ និងដំណើរនៃការផលិតកុន ដែលចំណាយទុនសរុបចំនួន ៨ ម៉ឺនដុល្លារ (ចំណាយថត ៧ ម៉ឺនដុល្លារ និងចាយ ១ ម៉ឺនដុល្លារ ផ្នែកទីផ្សារផ្សព្វផ្សាយ) ថា៖ «មូលហេតុ ដែលខ្ញុំផលិតខ្សែភាពយន្តរឿង «គ្រោះជីវិតកូវីដ ១៩» នេះឡើងដោយសារជំងឺកូវីដ ១៩ ជាវិបត្តិសកលពិភពលោកបានជួបប្រទះនៅចុងឆ្នាំ ២០១៩ ដែលមនុស្សគ្រប់រូបគួរតែចងចាំ។ ម្យ៉ាងទៀត ការរៀបចំផលិតកុននេះ ដោយសារតែមានវិបត្តិកូវីដ ១៩ ហើយរោងកុននានាក៏ត្រូវបានបិទទ្វារទៀត។ កុននេះបានថត ២ ដំណាក់កាល គឺដំណាក់កាលទី១ ពេលបិទខ្ទប់ទីក្រុងឆ្នាំ ២០២១ និងដំណាក់កាលទី២ ថត នាពេលជំងឺកូវីដមានស្ថានភាពប្រសើរបន្តិច និងត្រូវគេអនុញ្ញាតឱ្យដើរហើរវិញនោះ។ សាច់រឿងថតចប់ត្រឹមពេលមានព្រឹត្តិការណ៍ឆ្លងសហគមន៍ធំ ដែលប្រើពេលថត ១ ខែ ហើយយើងក៏បានទុកពេលចោលជិត ២ ឆ្នាំ» ៕
