អន្តរជាតិ៖ កាលពីថ្ងៃទី២៧ ខែឧសភា ឆ្នាំ២០២២ តុលាការប្រជាជននៃទីក្រុងហូជីមិញ បានកាត់ទោសជនជាប់ចោទឈ្មោះ Pham Thi Tu Trinh អាយុ៣៤ឆ្នាំ រស់នៅទីក្រុង Thu Duc ទីក្រុងហូជីមិញ ឲ្យជាប់ពន្ធនាគាររយៈពេល១២ឆ្នាំ ពីបទឃាតកម្ម បន្ថែមពីលើនេះអង្គជំនុំជម្រះបានបង្ខំចុងចោទឲ្យបង់ប្រាក់២០លានដុងដល់ជនរងគ្រោះទៀតផង។ នេះបើយោងតាមការចុះផ្សាយរបស់សារព័ត៌មាន Zingnews ។
តាមដីកាបង្គាប់បានឲ្យដឹងថា កាលពីខែមិថុនា ឆ្នាំ២០២០ នាង Pham Thi Tu Trinh បានខ្ចីប្រាក់ពីលោកស្រី VTKP ចំនួន៤១លានដុង ក្នុងអត្រាការប្រាក់២លានដុងក្នុងមួយខែ។ ដោយសារចុងចោទជំពាក់ការប្រាក់២ខែ អ្នកស្រី VTKP ដែលជាម្ចាស់បំណុលបានគណនាទាំងប្រាក់ដើម និងការប្រាក់ឡើងដល់៤៥លានដុង ហើយកូនបំណុលបានសន្យាថានឹងបង់ប្រាក់នៅថ្ងៃទី៣១ ខែធ្នូ ឆ្នាំ២០២០។
លុះនៅម៉ោងប្រហែល១០យប់ ថ្ងៃទី ៣១ ខែធ្នូ ឆ្នាំ២០២០ អ្នកស្រី ក៏បានបានទៅផ្ទះរបស់នាង Trinh ក្នុងសង្កាត់ Long Phuoc ទីក្រុង Thu Duc ដើម្បីយកលុយ។ បន្ទាប់មកនាង Trinh បាននិយាយថា នាងនឹងបង់ប្រាក់ ២៥លានដុងជាមុន ហើយ២០លានដុង សន្យារហូតដល់ថ្ងៃទី២៩ នៃឆ្នាំថ្មីដើម្បីទូទាត់នៅពេលក្រោយ។
ពេលអ្នកស្រី VTKP កំពុងរង់ចាំលុយ នាង Trinh ក៏បានប្រើខ្សែឆ័ត្ររឹតកជនរងគ្រោះ ភ្លាមៗនោះជនរងគ្រោះបានវាយតបវិញ ហើយបានហៅឱ្យគេជួយ បន្ទាប់មកអ្នកជិតខាងឮក៏មកជួយអន្តរាគមន៍ ភ្លាមៗនោះអ្នកស្រី ក៏បានទៅប៉ុស្តិ៍នគរបាលដើម្បីរាយការណ៍។
នៅក្នុងតុលាការថ្ងៃនេះ នាង Trinh បានទទួលស្គាល់ពីបទល្មើស ដោយជនជាប់ចោទបានផ្តល់សក្ខីកម្មថា ដោយសារខ្លួនមិនអាចសងបំណុលគេ និងខ្លាចម្ចាស់បំណុលប្រាប់គ្រួសារនាង ទើបមានចេតនាសម្លាប់ជនរងគ្រោះ។
យ៉ាងណាមិញគណៈវិនិច្ឆ័យបានរកឃើញថា ស្ថានភាពគ្រួសាររបស់ចុងចោទមានការលំបាក នាងត្រូវចិញ្ចឹមកូនតូចម្នាក់ ក្នុងអំឡុងពេលដំណើរការស៊ើបអង្កេត ចុងចោទបានស្ម័គ្រចិត្តសងបំណុលចំនួន ៤៥លានដុងដល់ជនរងគ្រោះ ហើយបានយល់ព្រមដោយស្ម័គ្រចិត្តបង់បន្ថែមចំនួន២០លានដុង ៕