ក្រុមហ៊ុនលោកខាងលិចជាច្រើនបិទទ្វារឈប់រកស៊ីនៅរុស្ស៊ី ដើម្បីឆ្លើយតបនឹងសង្រ្គាមនៅអ៊ុយក្រែន។ ប៉ុន្តែសម្រាប់ប្រធានាធិបតីរុស្ស៊ី វ្ល៉ាឌីមៀ ពូទីន ការចាកចេញនេះ ជារឿងល្អ ព្រោះវាអនុញ្ញាតឱ្យអាជីវកម្មក្នុងស្រុកអាចលូតលាស់ និងអាចជំនួសក្រុមហ៊ុនបរទេសទាំងនោះ។ លោក ពូទីន ក៏អះអាងថាមូស្គូនឹងអាចស្វែងរកផ្លូវផ្សេងពីទីផ្សារលោកខាងលិចក្នុងការទទួលបានបច្ចេកវិទ្យាទំនើប និងទំនិញប្រណីតផ្សេងៗ។
តាំងពីសង្គ្រាមរុស្ស៊ី-អ៊ុយក្រែនបានចាប់ផ្ដើមមក ក្រុមហ៊ុនវិនិយោគបរទេសធំៗបានបិទទ្វារ និងចាកចេញពីរុស្ស៊ីក្នុងគោលបំណងដាក់សម្ពាធលើក្រុងមូស្គូ។ យ៉ាងណាមិញ អំឡុងការថ្លែងសុន្ទរកថាតាមប្រព័ន្ធវីដេអូទៅកាន់អតីតមេដឹកនាំសហភាពសូវៀត នៅថ្ងៃទី២៦ ខែឧសភា ប្រធានាធិបតីរុស្ស៊ី វ៉្លាឌីមៀ ពូទីន លើកឡើងថា ការចាកចេញរបស់ក្រុមហ៊ុនបរទេស ជារឿងល្អសម្រាប់រុស្ស៊ី ខណៈរុស្ស៊ីបែរទៅរកដៃគូផ្សេងទៀតដូចជាចិន និងឥណ្ឌាជាដើម។
«ពេលខ្លះនៅពេលដែលយើងក្រឡេកមើល (ក្រុមហ៊ុនបរទេស) ដែលចាកចេញ ប្រហែលជាយើងត្រូវអរគុណព្រះព្រោះយើងនឹងអាចកាន់កាប់ទីផ្សារសំខាន់របស់ពួកគេវិញ។ អាជីវកម្មរបស់យើង ផលិតកម្មរបស់យើងបានរីកចម្រើន ហើយវានឹងមានសុវត្ថិភាពនៅលើទឹកដីរុស្ស៊ី»។ លោក ពូទីន សង្កត់ធ្ងន់បែបនេះ ដោយចង់សំដៅលើភាពល្អប្រសើរក្នុងការរកស៊ីជាមួយដៃគូក្នុងស្រុកជំនួសឱ្យក្រុមហ៊ុនបរទេសជាពិសេសលោកខាងលិច។
មេដឹកនាំរុស្ស៊ីរូបនេះក៏បានបន្តថា របស់ប្រណីតៗដូចជារថយន្ត Mercedes នឹងនៅតែមាន តែលោកទទួលស្គាល់ថា វាអាចនឹងមានតម្លៃថ្លៃជាងបន្តិចដោយសាររថយន្តបែបនោះអាចនឹងត្រូវ បាននាំចូលពីប្រទេសផ្សេងៗ។ ទាក់ទិនរឿងបច្ចេកវិទ្យាទំនើប លោក ពូទីន បញ្ជាក់ថា រុស្ស៊ីនៅតែត្រូវការបច្ចេកវិទ្យាទាំងនោះពីប្រទេសមានសេដ្ឋកិច្ចអភិវឌ្ឍ តែមិនមែនពីទីផ្សារលោកខាងលិចដោយផ្ទាល់ទេ។ បើតាមប្រមុខរដ្ឋរុស្ស៊ី ការប៉ុនប៉ងរបស់លោកខាងលិចចង់ឱ្យរុស្ស៊ីនៅឯកោ នឹងមិនបានសម្រេចឡើយ ព្រោះប្រទេសមួយចំនួនកំពុងប្រឈមមុខនឹងអតិផរណា ការខ្វះខាតក្នុងការផ្គត់ផ្គង់ និងវិបត្តិស្បៀងអាហារជាដើម៕