ខេត្តព្រះសីហនុ៖ កាលពីរសៀលថ្ងៃទី១៨ ខែឧសភា ឆ្នាំ២០២២ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ និងលោកជំទាវ បានដឹកនាំគណៈប្រតិភូខេត្តព្រះសីហនុ ចុះពិនិត្យគម្រោងអភិវឌ្ឍកោះឫស្សី ឃុំរាម ស្រុកព្រៃនប់ ខេត្តព្រះសីហនុ ដើម្បីពិនិត្យស្ថានភាព នៃការអភិវឌ្ឍ ដែលក្រុមហ៊ុនបានវិនិយោគនាពេលកន្លងមក។
ឯកឧត្តមអភិបាលខេត្ត បានលើកឡើងថា ដៃគូវិនិយោគកោះឫស្សី គឺបានអនុវត្តទៅតាមច្បាប់ដែលបានកំណត់ទាក់ទងនឹងបញ្ហាបរិស្ថានដែលជាកត្តាចម្បង ក្នុងការអភិវឌ្ឍនៅលើដែនកោះនាពេលបច្ចុប្បន្ន ក្នុងនោះក្រុមហ៊ុនបានរក្សាព្រៃឈើ ការគ្រប់គ្រងកាកសំណល់រឹង រាវ បានត្រឹមត្រូវ មិនមានការបង្ហូរចូលទៅក្នុងសមុទ្រ ដែលបង្កឱ្យបាត់នូវសោភ័ណភាព និងប៉ះពាល់បរិស្ថានតំបន់ឆ្នេរ និងទឹកសមុទ្រ ហើយក្រុមហ៊ុនបានអភិវឌ្ឍទេសចរណ៍ធម្មជាតិលើផ្នែកសណ្ឋាគារ បឹងកាឡូ រីសត ដែលមានស្តង់ដារកម្រិតកម្រិតខ្ពស់ ប្រកបដោយផាសុខភាព។.jpg)
ឯកឧត្តម បានបន្ថែមថា ដំណើរទស្សនៈកិច្ចដឹកនាំមន្ត្រី មន្ទីរពាក់ព័ន្ធចុះពិនិត្យមើលការអភិវឌ្ឍន៍នាពេលនេះ ក្នុងគោលបំណងជំរុញលើកទឹកចិត្តដល់អ្នកវិនិយោគដែលបាន និងកំពុងខិតខំក្នុងការអភិវឌ្ឍនៅលើគ្រប់វិស័យទាំងដីគោក និងដីកោះដើម្បីធ្វើយ៉ាងណាឱ្យខេត្តព្រះសីហនុ កាន់តែមានការអភិវឌ្ឍបង្កើនមុខរបរជូនប្រជាពលរដ្ឋ កាត់បន្ថយការចំណាកស្រុក ហើយឯកឧត្តម នឹងគាំទ្ររាល់ការវិនិយោគគ្រប់វិស័យដែលមកពីបណ្ដាប្រទេសនានា ដោយរក្សាសន្តិសុខសុវត្ថិភាពសណ្ដាប់ធ្នាប់ជូនពួកគាត់ផងដែរ។ ដូចនេះ សូមឱ្យបងប្អូនភ្ញៀវទេសចរជាតិ និងអន្តរជាតិមកលេងនៅកោះឫស្សីដែលមានសណ្ឋាគារលំដាប់ផ្កាយ និងមានសេវាកម្មល្អក្នុងការទទួលភ្ញៀវទេសចរមកលេងកម្សាន្តផងដែរ។
សូមបញ្ជាក់ថា គម្រោងវិនិយោគកោះឫស្សី មានទីតាំងមួយផ្នែកនៃកោះឫ ស្សី ឃុំរាម ស្រុកព្រៃនប់ ខេត្តព្រះសីហនុ ដែលមានទំហំ៧៨ហិចតា ដែលបានចុះកិច្ចសន្យាជួលពីរាជរដ្ឋាភិបាល នៅថ្ងៃទី២៨ ខែកុម្ភៈ ឆ្នាំ២០០៨។ កោះឫស្សី វីឡា & រីសត មាន៥០ លុចហ្សារី ផាវីលាន (luxurious pavilions) និង១៣ ភូល វីឡា (pool villas) ដែលជាកន្លែងសម្រាកលំហែធម្មជាតិដ៏ល្អជាមួយនឹងឆ្នេរឯកជនប្រវែង ១,២ គីឡូម៉ែត្រ បែរមុខទៅសមុទ្រ។ រមណីយដ្ឋាននេះ មានភោជនីយដ្ឋានចំនួន០២ បារចំនួន០១ និងស្ប៉ាដែលមានបន្ទប់ចំនួន០៥បន្ទប់អាងហែលទឹករួមទំហំ៣០ម៉ែត្រ កន្លែងហាត់ប្រាណបើក២៤ម៉ោង និងយូហ្គា ព្រមទាំងសកម្មភាពនៅលើឆ្នេរសមុទ្រជាដើម។
