ភ្នំពេញ៖ យោងតាមការបង្ហោះរបស់ក្រុមព្រះសូរិយាបានឲ្យដឹងថា៖ «អ្នកអង្គម្ចាស់ ស៉ីសុវត្ថិ រដ្ឋារី ឌីម៉ង់ ព្រះអនុជពៅនៃអ្នកអង្គម្ចាស់ ស៉ីសុវត្ថិ សិរិមតៈ បានសោយទិវង្គតដោយព្រះរោគាពាធ នៅមន្ទីរពេទ្យមួយក្នុងទីក្រុង Anaheim រដ្ឋកាលីហ្វ័ញ៉ា សហរដ្ឋអាមេរិក វេលាម៉ោង១ និង៣០នាទីរំលងអាធ្រាត្រថ្ងៃទី ៨ ខែឧសភា ឆ្នាំ២០២២ ម៉ោងនៅសហរដ្ឋអាមេរិក ត្រូវនិងម៉ោង៤ល្ងាច ម៉ោងនៅរាជធានីភ្នំពេញ ក្នុងព្រះជន្មាយុ ៨៧ព្រះវស្សា។
ក្រុមព្រះសុរិយា សូមចូលរួមរំលែកទុក្ខយ៉ាងក្រៀមក្រំនេះជាមួយក្រុមព្រះញាតិនៃព្រះសពពីចម្ងាយ។
ទូលព្រះបង្គំ ទាំងអស់សូមបួងសួងដល់ដួងព្រះវិញ្ញាណក្ខន្ធព្រះអង្គ សូមយាងទៅសោយសុខក្នុងបរមសុគតិភពកុំបីឃ្លាងឃ្លាតឡេីយ។
សូមជ្រាបផងដែរថា អ្នកអង្គម្ចាស់ ស៉ីសុវត្ថិ រដ្ឋារី ឌីម៉ង់ ទ្រង់ប្រសូតនៅឆ្នាំ១៩៣៤ នារាជធានីភ្នំពេញ ជាព្រះបុត្រាពៅនៃព្រះអង្គម្ចាស់ ស៉ីសុវត្ថិ រដ្ឋារី និងអ្នកម្នាង សួង។ អ្នកអង្គម្ចាស់ បបានបំពេញវិជ្ជានៅវិទ្យាល័យព្រះស៉ីសុវត្ថិ ហេីយបានចូលបំរេីការងាររាជការជាបន្តបន្ទាប់ រហូតដល់ឆ្នាំ១៩៧០ ទ្រង់យាងទៅបំពេញការងារ ការទូតនៅប្រទេសលាវ។
នៅឆ្នាំ១៩៧៥ ពេលខ្មែរក្រហមឡេីងកាន់អំណាច អ្នកអង្គម្ចាស់ និងក្រុមព្រះញាតិផ្ទាល់ព្រះអង្គក៏យាងភៀសព្រះកាយទៅគង់សហរដ្ឋអាមេរិក រហូតដល់សព្វថ្ងៃ» ៕
