ថ្វីត្បិតតែរោគសញ្ញា «អ័ព្ទខួរក្បាល» មិនមានគ្រោះថ្នាក់ខ្លាំងដល់សុខភាព ប៉ុន្តែវាក៏អាចធ្វើឲ្យមានផលប៉ះពាល់ចំពោះគុណភាពនៃជីវិតរបស់មនុស្សផងដែរ ។
ដោយជំងឺអ័ព្ទខួរក្បាល គឺជាអារម្មណ៍មួយនៅពេលដែលគំនិតរបស់អ្នកតែងតែគិតយឺត ហើយភ្លេចភ្លាំងច្រើន មិនអាចផ្តោតអារម្មណ៍ និងមិនអាចបញ្ចេញបាន។ជាមួយគ្នានេះ វាក៏មានមូលហេតុផ្សេងៗគ្នាជាច្រើនទៀតនៃរោគសញ្ញាអ័ព្ទក្នុងខួរក្បាលនេះផងដែរដូចជា ៖
– ភាពតានតឹង
– កង្វះដំណេក
– ការផ្លាស់ប្តូរអ័រម៉ូនដោយសារវដ្តរដូវ ឬការមានផ្ទៃពោះ
– របបអាហារមិនត្រឹមត្រូវ
– កម្រិតវីតាមីន B12 ទាប
– ការប្រើប្រាស់ថ្នាំ
– បញ្ហាសុខភាពដូចជា ជំងឺធ្លាក់ទឹកចិត្ត ជំងឺទឹកនោមផ្អែម រោគសញ្ញា Sjogren ឈឺក្បាលប្រកាំង
– បញ្ហាក្រពេញទីរ៉ូអ៊ីត ការខ្វះជាតិទឹក និងការព្យាបាលដោយប្រើគីមី ជាដើម ។
ដើម្បីកែលម្អជំងឺអ័ព្ទខួរក្បាល អ្នកអាចអនុវត្តវិធានការទាំងនេះនៅផ្ទះបានដោយខ្លួនឯង ៖
– របបអាហារមេឌីទែរ៉ាណេ
យោងតាមការសិក្សាមួយបានបង្ហាញប្រាប់ឲ្យដឹងថា មនុស្សពេញវ័យដែលញ៉ាំត្រី បន្លែ និងផ្លែឈើ សណ្ដែក គ្រាប់ធញ្ញជាតិ និងប្រេងអូលីវ វានឹងជួយបង្កើនសមត្ថភាពចងចាំខួរក្បាលរបស់ពួកគេច្រើនជាងអ្នកដែលញ៉ាំអាហារទាំងនេះតិច។ ព្រោះតែត្រីសាម៉ុងសម្បូរទៅដោយវីតាមីន B12 ដែលមានសារៈសំខាន់សម្រាប់មុខងារសរសៃប្រសាទ។ លើសពីនេះ អាស៊ីតខ្លាញ់អូមេហ្គា 3 នៅក្នុងត្រីក៏អាចបង្កើនការផ្តោតអារម្មណ៍ និងល្បឿននៃការគិតចំពោះអ្នកដែលមានបញ្ហាការយល់ដឹងកម្រិតស្រាល ព្រមទាំងមានសារធាតុប្រឆាំងអុកស៊ីតកម្មដែលជួយដល់ការបណ្តុះបណ្តាលខួរក្បាលផងដែរ។
– គេងឱ្យបានច្រើន
ការគេងឱ្យបានគ្រប់គ្រាន់ នឹងជួយបង្កើនសមត្ថភាពក្នុងការផ្តោតអារម្មណ៍ និងរក្សាការយកចិត្តទុកដាក់បានល្អ ។ ប្រសិនបើអ្នកមានបញ្ហាក្នុងការគេង អ្នកត្រូវតែអនុវត្តដោយការសម្រាក កាត់បន្ថយការប្រើប្រាស់ឧបករណ៍អេឡិចត្រូនិក ដើម្បីចៀសវាងអ័រម៉ូនសរសៃប្រសាទដែលត្រូវបានជំរុញដោយឥទ្ធិពលនៃពន្លឺពណ៌ខៀវ។
– ធ្វើលំហាត់ប្រាណ
លំហាត់ប្រាណនឹងជួយឱ្យអ្នកភ្ញាក់ បង្កើនឈាម និងអុកស៊ីហ្សែនដល់ខួរក្បាល បង្កើនការគេង និងកាត់បន្ថយហានិភ័យសុខភាពដែលអាចធ្វើឲ្យខួរក្បាលអសកម្ម។យោងតាមការស្រាវជ្រាវមួយបានបង្ហាញថា រាល់ការដើររយៈពេល 10 នាទីវានឹងជួយជំរុញឲ្យខួរក្បាល បង្កើនសមត្ថភាពក្នុងការផ្តោតអារម្មណ៍ និងប្រតិកម្មរហ័សនៅពេលធ្វើការ ដែលអ្នកគួរតែហាត់ប្រាណជាមធ្យម 150 នាទីក្នុងមួយសប្តាហ៍។
– ញ៉ាំប្រូតេអ៊ីនឲ្យបានច្រើន
នៅឱ្យឆ្ងាយពីអាហារដែលមានជាតិកាបូអ៊ីដ្រាតខ្ពស់ និងអាហារឥតបានការ ដើម្បីប្រយុទ្ធប្រឆាំងនឹងការគាំងថាមពល ព្រោះវាអាចរារាំងសកម្មភាពដាស់តឿនដល់កោសិកាសរសៃប្រសាទក្នុងខួរក្បាល។ការជ្រើសរើសអាហារសម្បូរប្រូតេអ៊ីន ដែលមានអាស៊ីតអាមីណូតិចតួច នឹងជួយជំរុញកោសិកាសរសៃប្រសាទឱ្យដំណើរការបានត្រឹមត្រូវ។ លើសពីនេះ ការផឹកទឹកឱ្យបានគ្រប់គ្រាន់ និងការគេងពី ១០ ទៅ ២០ នាទីក្នុងមួយថ្ងៃ ក៏អាចជួយបង្កើនការយល់ដឹងបន្ថែមសម្រាប់ខួរក្បាលផងដែរ ។
– ប្រើប្រេង rosemary
យោងតាមការសិក្សាមួយចំនួនបានបង្ហាញថា ក្លិនក្រអូបនៃប្រេងសំខាន់ៗដូចជា rosemary ក៏អាចជួយបង្កើនដំណើរការការងាក្នុងខួរក្បាលរបស់អ្នកផងដែរ ដោយអ្នកជំនាញជាច្រើនបានលើកទឹកចិត្តឲ្យមនុស្ស សាកល្បងប្រើប្រាស់វាព្រោះតែមិនមានភស្តុតាងណាដែលបញ្ជាក់ពីផលប៉ះពាល់ដល់សុខភាពនៃផលិតផលនេះផងដែរ៕
អត្ថបទដោយ៖សុផានីត
