រាជធានីភ្នំពេញ៖ ទោះជាចូលសម្រាកនៅមន្ទីរពេទ្យកាល់ម៉ែតបានមួយរយៈធំក្តី ក៏ស្ថានភាពជំងឺរលាកស្រោមខួរក្បាលរបស់លោក អៀង ចេនឡា ដែលជាតារាកំប្លែង និងជាតារាចម្រៀងផង ក៏មិនទាន់បានធូរស្បើយដែរ ដោយស្ថានភាពជំងឺនៅតែធ្ងន់ធ្ងរ កាន់តែវិវត្តន៍ទៅមុខ ពិបាកនឹងព្យាបាល តែយ៉ាងណា ក្រុមគ្រូពេទ្យ នឹងខិតខំប្រឹងព្យាបាលលោកអៀង ចេនឡាឲ្យអស់ពីសមត្ថភាព។
សូមបញ្ជាក់ថា កាលពី៦ខែមុន លោក អៀង ចេនឡា ធ្លាប់មានជំងឺទឹកចូលសួតធ្ងន់ធ្ងរម្ដងរួចមកហើយ ប៉ុន្តែលោកបានព្យាបាលជាសះស្បើយឡើងវិញ។ ទើបតែជាសះស្បើយ ប្រហែលបាន៥ខែ ស្រាប់តែនៅថ្ងៃទី៤ ខែកុម្ភៈ ឆ្នាំ២០២២នេះ លោក ចេនឡា ក៏មានជំងឺរលាកស្រោមខួរក្បាលមកទៀត។
អ្នកស្រី ចាន់ធី បន្តថា កូនប្រុសគាត់ចាប់ផ្ដើមឈឺក្បាល នៅថ្ងៃទី០៤ ខែកុម្ភៈ ឆ្នាំ២០២២ ហើយគាត់បានបញ្ជូនកូនប្រុសទៅមន្ទីរឯកជនមួយកន្លែង ប៉ុន្តែរកមិនឃើញរោគសញ្ញាអ្វីឡើយ។ បន្ទាប់មកបានបញ្ជូនកូនទៅមន្ទីរពេទ្យបាយ័ន ហើយក្រុមគ្រូពេទ្យនៅទីនោះចោះខួរខ្អឹងខ្នង យកទៅពិនិត្យ ទើបឃើញថា កូនប្រុសគាត់មានជំងឺរលាកស្រោមខួរក្បាល និងអាចមានផ្សិតនៅក្នុងខួរក្បាលផងដែរ។ លុះនៅថ្ងៃទី១៥ ខែកុម្ភៈ ឆ្នាំ២០២២គាត់សម្រេចចិត្តប្តូរមន្ទីរពេទ្យ ដោយបានបញ្ជូនទៅមន្ទីរពេទ្យកាលម៉ែត ៕
