បន្ថែមពីលើ ជំងឺធ្លាក់ទឹកចិត្ត ដែលជាជំងឺគ្រោះថ្នាក់ និងត្រូវការការព្យាបាលភ្លាមៗ ។ ជាមួយគ្នានេះ ក៏មានជំងឺមួយប្រភេទទៀត ដែលត្រូវបានគេហៅថា ជាជំងឺធ្លាក់ទឹកចិត្តដោយមិនដឹងខ្លួន ដែលវាជាជំងឺដ៏កាន់តែគ្រោះថ្នាក់មួយបន្ថែមទៀតពីលើជំងឺបាក់ទឹកចិត្តធម្មតា ដោយតាមវេជ្ជសាស្ត្រ យើងអាចហៅរោគសញ្ញានេះថា “Masked Depression” ឬហៅថា “ការធ្លាក់ទឹកចិត្តលាក់កំបាំង” ។
អ្វីទៅជាជំងឺធ្លាក់ទឹកចិត្តលាក់កំបាំង ?
វេជ្ជបណ្ឌិត Kraisit Narukhatpichai ដែលជាវេជ្ជបណ្ឌិតផ្នែកចិត្តវិទូ និងជានាយកគ្រប់គ្រង មន្ទីរពេទ្យ Manarom បានធ្វើការបញ្ជាក់ថា “Masked Depression” ឬហៅថា ការធ្លាក់ទឹកចិត្តលាក់កំបាំង ជារឿយៗមិនមានរោគសញ្ញាច្បាស់លាស់នៃជំងឺធ្លាក់ទឹកចិត្តនោះទេ។ ដោយមនុស្សជាច្រើនដែលមានជំងឺនេះ នៅតែអាចទទួលខុសត្រូវលើការងាររបស់ខ្លួន និយាយសួរសុខទុក្ខ និងញញឹមជាមួយមនុស្សជិតស្និទ្ធដូចជាគ្មានបញ្ហា ប៉ុន្តែជារឿយៗពួកគេនឹងមានការថប់បារម្ភ មិនសប្បាយចិត្ត តែងតែនិយាយ ឬបង្ហាញពីជំងឺរាងកាយដូចជា ឈឺក្បាល ឈឺខ្នង និង ចង្អោរ ។ ដែលវាខុសពីជំងឺធ្លាក់ទឹកចិត្តធំ អ្នកជំងឺនឹងមានរោគសញ្ញានៃជំងឺធ្លាក់ទឹកចិត្តជាក់ស្តែងដូចជា ធុញទ្រាន់ បាក់ទឹកចិត្ត ខ្វះការចាប់អារម្មណ៍លើសកម្មភាពដែលពួកគេធ្លាប់រីករាយ បាត់បង់ចំណង់អាហារ ស្រកទម្ងន់ គេងមិនលក់ មានអារម្មណ៍ថាគ្មានតម្លៃ ចង់ស្លាប់ជាដើម ។
រោគសញ្ញាគួរឱ្យកត់សម្គាល់ នៃអ្នកជំងឺដែលមានជំងឺធ្លាក់ទឹកចិត្តមិនទាន់ឃើញច្បាស់ ឬលាក់កំបាំង មានដូចជា ៖
– ឧស្សាហ៍និយាយ ឬបង្ហាញពីជំងឺផ្លូវកាយដូចជា ឈឺក្បាល ឈឺខ្នង ឈឺពោះ ឈឺទ្រូង ដង្ហើមខ្លី ចង្អោរ និងឈឺពោះ។
– ទៅជួបគ្រូពេទ្យដើម្បីរកឱ្យឃើញនូវអ្វីដែលអាចបណ្តាលឱ្យមានជម្ងឺរាងកាយរបស់អ្នក ប៉ុន្តែវាពិបាកក្នុងការស្វែងរកមូលហេតុពិតប្រាកដ អាចព្យាបាលបានតែតាមរោគសញ្ញាដែលកើតឡើងជាបន្តបន្ទាប់
– អ្នកនៅតែអាចធ្វើការ សិក្សាឬធ្វើសកម្មភាពប្រចាំថ្ងៃធម្មតាបានដូចធម្មតា ទោះបីស្ថិតនៅក្នុងស្ថានការណ៍យ៉ាប់យឺន និងលំបាកខ្លាំង ប៉ុន្តែមិនធ្ងន់ធ្ងរដូចអ្នកជំងឺធ្លាក់ទឹកចិត្តទេ ដែលអាចមានរោគសញ្ញាច្រើនរហូតដល់មិនអាចសិក្សា ឬធ្វើការឬទទួលខុសត្រូវចំពោះរឿងដែលធ្លាប់ល្អដូចមុន។
– អស្ថិរភាពអារម្មណ៍ នៅពេលដែលធ្វើអ្វីមូយមិនជោគជ័យ និងសម្រេចដូចក្ដីបំណង និងការចង់បាន អ្នកនឹងមានអារម្មណ៍សោកស្តាយ និងមានការខកចិត្តយ៉ាងខ្លាំង បន្ទោសខ្លួនឯង ខឹងខ្លួនឯងដែលមិនអាចធ្វើបាន រួមទាំងឆាប់ខឹងនឹងរឿងតូចតាច និងមានភាពប្រែប្រួលផ្លូវអារម្មណ៍ខ្ពស់ផងដែរ ។
– មានអាកប្បកិរិយាបែប workaholic ពោលគឺលះបង់ខ្លួនឯងក្នុងការសិក្សា ឬធ្វើការច្រើនពេក រហូតដល់បង្ខំខ្លួនឯងដោយមិនដឹងខ្លួន ដាក់សម្ពាធលើខ្លួនឯងដើម្បីធ្វើវា ព្យាយាមអាន ឬអង្គុយធ្វើការទាំងថ្ងៃទាំងយប់រហូតដល់ភ្លេចយកចិត្តទុកដាក់ចំពោះសុខភាពខ្លួនឯង និងស្រឡាញ់ខ្លួនឯង ។
– ក្នុងករណីខ្លះ ការរំពឹងទុកមិនសូវមាន ដែលបណ្តាលឱ្យមានភាពតានតឹង ឬបញ្ហាគេងមិនលក់ រហូតដល់ត្រូវដោះស្រាយបញ្ហាដោយការប្រើប្រាស់គ្រឿងស្រវឹង ស្រា ថ្នាំងងុយគេង ឬថ្នាំញៀន ជាដើម។
អត្ថបទដោយ៖ សុផានីត
