វៀតណាម ៖ ពិធីបុណ្យចូលឆ្នាំចិន និងវៀតណាម បានបញ្ចប់ទៅអស់រយៈពេល៩ថ្ងៃហើយ ប៉ុន្តែកម្មករោងចក្រររាប់ពាន់នាក់ នៅសល់ចំហាយ មិនទាន់វិលត្រលប់មកធ្វើការវិញនៅឡើយ ធ្វើឲ្យរោងចក្រមួយចំនួននៅក្នុងប្រទេសវៀតណាម ខ្វះកម្លាំងធ្វើការ។
កាសែត VNExpress របស់វៀតណាម បានធ្វើការចុះផ្សាយថា នៅក្នុងទីក្រុង Bac Giang ក្រុមហ៊ុនចំនួន៧២ បានចុះបញ្ជីជ្រើសរើសបុគ្គលិកកម្មករជាង ៤៣ ០០០នាក់តាមរយៈសេវាជ្រើសរើសការងាររបស់ខេត្តស្ថិតនៅភាគខាងជើងមួយនេះ ដែលកើនឡើង ១១ភាគរយធៀបនឹងចុងឆ្នាំមុន។
លោក Nguyen Xuan Ngoc អនុប្រធានក្រុមប្រឹក្សាគ្រប់គ្រងសួនឧស្សាហកម្មក្រុង Bac Giang បានប្រាប់កាសែត VNExpress ថា កង្វះកម្លាំងពលកម្មកើតមានឡើង ខណៈដែលរោងចក្រនានាចាប់ផ្តើមប្រតិបត្តិការឡើងវិញនៅសប្តាហ៍នេះ ប៉ុន្តែបុគ្គលិកកម្មករដែលរស់នៅក្នុងខេត្តខ្ពង់រាបភាគខាងជើងនានាមិនទាន់វិលត្រលប់មកវិញនៅឡើយ ដោយសារពួកគេចង់ចំណាយពេលយូរជាមួយក្រុមគ្រួសាររបស់ខ្លួន ហើយលោកសង្ឃឹមថា ពួកគេនឹងវិលត្រលប់មកធ្វើការវិញនៅថ្ងៃទី១៥ ខែកុម្ភៈ។សូមបញ្ជាក់ថា សម្រាប់ត្រីមាសដំបូងក្នុងឆ្នាំនេះ កម្មករចំនួន ១០.០០០នាក់ត្រូវការជាចំបាច់សម្រាប់ក្រុមហ៊ុននានា ស្ថិតនៅក្នុងតំបន់ឧស្សាហកម្ម ក្រុមហ៊ុនវិនិយោគផ្ទាល់ពីបរទេសក្នុងវិស័យវាយនភ័ណ្ឌ និងអេឡិចត្រូនិចត្រូវបានរាយការណ៍ថាជាក្រុមហ៊ុនដែលត្រូវការកម្មករច្រើនជាងគេក្រោយបុណ្យចូលឆ្នាំវៀតណាម។
ក្រុមហ៊ុន Luxshare ICT Vietnam Ltd ដែលជាក្រុមហ៊ុនផលិតកម្មដៃគូរបស់ក្រុមហ៊ុន Apple កំពុងជ្រើសរើសកម្មករថ្មីចំនួន ៣០.០០០នាក់។ ក្រុមហ៊ុនផលិតកម្មផ្សេងទៀតរួមទាំងក្រុមហ៊ុន New Wing Interconnect Technology (Bac Giang) Co. Ltd និងក្រុមហ៊ុន Lens Technology Vietnam Co. Ltd ត្រូវការកម្មករពី ១.៥០០នាក់ដល់ ៥.០០០នាក់៕