ថៃ៖ ពលរដ្ឋថៃពាសពេញផ្ទៃប្រទេសបានងាកមកបរិភោគសាច់ក្រពើវិញ នៅចំពោះមុខការឡើងថ្លៃសាច់ជ្រូក ខណៈសាច់ក្រពើឥឡូវនេះមានតម្លៃសមរម្យជាងសាច់ជ្រូក ហើយអ្នកបរិភោគបានលាន់មាត់ថា វាគឺជាជម្រើសដ៏ល្អបំផុតដែលសាច់ក្រពើមានរសជាតិឆ្ងាញ់ដូចទៅនឹងសាច់មាន់។ នេះបើយោងតាមការចុះផ្សាយរបស់សារព័ត៌មាន Laotiantimes ។
រលកនៃជំងឺគ្រុនផ្តាសាយជ្រូកអាហ្រ្វិក (ASF) បានបោកបក់ពេញប្រទេសថៃ ដោយធ្វើឱ្យមានការបំផ្លិចបំផ្លាញដល់ឧស្សាហកម្មចិញ្ចឹមជ្រូករបស់ប្រទេសចាប់តាំងពីឆ្នាំមុន កសិករចិញ្ចឹមជ្រូកថៃបានបាត់បង់អាជីវកម្មដោយសារជ្រូកងាប់យ៉ាងច្រើនសន្ធឹកសន្ធាប់ ខណៈការខ្វះខាតសាច់ជ្រូកក្នុងប្រទេសថៃបានធ្វើឱ្យតម្លៃឡើងថ្លៃពី ១៥០បាតក្នុងមួយគីឡូក្រាម ដល់ទៅ២៤០បាតក្នុងមួយគីឡូក្រាម។
កសិដ្ឋានចិញ្ចឹមក្រពើឥឡូវនេះកំពុងតែកាក់កបនៅក្នុងការរកចំណូលក្នុងវិបត្តិសាច់ជ្រូក ជាមួយនឹងការកើនឡើងនៃតម្រូវការ ដោយឃើញតម្លៃសាច់ក្រពើឡើងដល់ចន្លោះពី ៨០ ទៅ ១៩០បាតក្នុងមួយគីឡូក្រាម។ការទិញភាគច្រើនទាក់ទាញតម្លៃថោក ដោយផ្នែកដែលថ្លៃបំផុតគឺកន្ទុយ ដែលអ្នកលក់និយាយថាមានសាច់ទន់ៗហើយមានជាតិខ្លាញ់តិច ក៏ប៉ុន្តែទោះបីជាតម្លៃកើនឡើងក៏ដោយ ក៏សាច់ក្រពើនៅតែមានតម្លៃថោកជាងសាច់ជ្រូកទៅទៀត។
យោងតាមរបាយការណ៍របស់ Nikkei Asia ក្រសួងកសិកម្មរបស់ប្រទេសថៃបាននិយាយថា មនុស្សប្រហែល ១ ១៥០នាក់ នៅក្នុងប្រទេសថៃ ជាម្ចាស់កសិដ្ឋានចិញ្ចឹមក្រពើ ឬពាក់ព័ន្ធនឹងអាជីវកម្មជួញដូរក្រពើ ខណៈទោះជាយ៉ាងណាក៏ដោយ ជាមួយនឹងការកើនឡើងនៃការចាប់អារម្មណ៍ពីសាធារណជន កសិករចិញ្ចឹមក្រពើ ដែលត្រូវការចិញ្ចឹមសត្វរបស់ពួកគេយ៉ាងហោចណាស់ ៣ ទៅ ៤ឆ្នាំ មុនពេលពួកគេអាចលក់ក្រពើចេញបាន ៕
