រាជធានីភ្នំពេញ ៖ ល្បែងស៊ីសងខុសច្បាប់ឆ្នោតវៀតណាម M9999 (កន្ទុយលេខ) កំពុងបើកដំណើរលេងយ៉ាងរលូន ហើយពង្រីកទីតាំងរបស់ខ្លួនជាបន្តបន្ទាប់ នៅតាមបណ្តាខណ្ឌ ក្នុងភូមិសាស្រ្តរាជធានីភ្នំពេញ ដោយម្ចាស់ឆ្នោតវៀតណាមខុសច្បាប់នោះ កំពុងសប្បាយកើបលុយ ពីប្រជាពលរដ្ឋដែលកំពុងញៀនល្បែងស៊ីសង តែឆ្ងល់ត្រង់ថា មិនឃើញកម្លាំងសមត្ថកិច្ច នៃស្នងការដ្ឋាននគរបាលរាជធានីភ្នំពេញ ពិសេស អាជ្ញាធរនៅតាមខណ្ឌ ទៅបង្ក្រាបសោះ សង្ស័យតែម្ចាស់ល្បែងស៊ីសងនោះ មានបារមីខ្លាំងពូកែ អាចបំបាំងខ្លួនពីភ្នែកសមត្ថកិច្ចបាន។
តាមសេចក្តីរាយការណ៍ ដែល«KBN»ទទួលបានទីតាំងកត់ឆ្នោតវៀតណាម M9999 នោះ ស្ថិតនៅតាមបណ្ដោយផ្លូវលេខ២៨៧ កែងនឹងផ្លូវលេខ៦១៤ស្ទួន ជាប់ខាងក្រោយផ្សារ៧មករា ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ។ ជារៀងរាល់ថ្ងៃ គេឃើញប្រជាពលរដ្ឋរស់នៅម្ដុំផ្សារ៧មករា ដែលញៀនល្បែងស៊ីសង បានដើរឲ្យមកតត្រុកមកចាក់ឆ្នោតនៅទីតាំងនេះ និងមានអ្នកខ្លះទៀតបានចាក់តាមប្រព័ន្ធទូរស័ព្ទ ឆាតតាមហ្វេសប៊ុក និងតេឡេក្រាមក៏មានដែរ។
ចំណែក នៅខណ្ឌឫស្សីកែវ វិញ ឆ្នោតវៀតណាមខុសច្បាប់M9999 គឺស្ថិតនៅតាមបណ្ដោយផ្លូវហួសទៅជ្រោះបាត់ស្នេហ៍ ជាប់ខាងជើងផ្សារសាំហាន់ ក្នុងសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ មិនទាន់ឃើញសមត្ថកិច្ចពាក់ព័ន្ធចុះទៅបង្ក្រាបដូចគ្នា សង្ស័យតែម្ចាស់ល្បែងស៊ីសងនោះ មានបារមីខ្លាំងពូកែមែន ទើបអាចបំបាំងខ្លួនពីភ្នែកសមត្ថកិច្ចបាន។
ប្រជាពលរដ្ឋបានឡើងថា ល្បែងស៊ីសងឆ្នោតវៀតណាមខុសច្បាប់ M9999 សមត្ថកិច្ចថ្នាក់មូលដ្ឋានហាកដូចជាមិនហ៊ានទៅបង្រ្កាបសោះ សង្ស័យតែចាញ់ម្ចាស់ឆ្នោតវៀតណាមខុសច្បាប់ M9999 មែន ។ ដូច្នេះហើយ ពួកគាត់សំណូមពរដល់ឯកឧត្តម ឃួង ស្រេង អភិបាលសាសារាជធានីភ្នំពេញ និងឯកឧត្តម ស ថេត ស្នងការនគរបាលរាជធានីភ្នំពេញ មេត្តាជួយបង្រ្កាបទីតាំងល្បែងស៊ីសងទាំងនេះផង កុំឲ្យនៅពង្វក់ប្រជាពលរដ្ឋខ្លាំងពេក ស្របតាមគោលនយោបាយភូមិ-ឃុំមានសុវត្ថិភាព របស់រាជរដ្ឋាភិបាល ៕ ដោយ កែន សុខគីម
