រាជធានីភ្នំពេញ ៖ ទីតាំងល្បែងស៊ីសងមួយកន្លែង បាននឹងកំពុងបើកលេងយ៉ាងពេញបន្ទុក ដែលជ្រកហាងកាហ្វេមួយ ស្ថិតនៅទល់មុខការ៉ាស់សាំងតូតាល់ ខាងត្បូងស្តុប IU (អាយូ) ប្រហែល២០០ម៉ែត្រ តាមបណ្តោយផ្លូវ១០១១ សង្កាត់ភ្នំពេញថ្មី ខណ្ឌសែនសុខ រង់ចាំតែសមត្ថកិច្ចពាក់ព័ន្ធខណ្ឌសែនសុខ ទៅបង្រ្កាបប៉ុណ្ណោះ។
ក្រោយពីទទួលបានសេចក្តីរាយការណ៍ពីប្រជាពលរដ្ឋល្អថា នៅហាងកាហ្វេ ចំណុចទីតាំងខាងលើ មានបង្កប់លេងល្បែងស៊ីសងតាមអនឡាញ និងភ្នាល់ដាក់ប្រាក់ចាក់មាន់តាមអនឡាញ ភ្នាក់ងារ «KBN» និងអ្នកកាសែតនៅអង្គភាពផ្សេងទៀត បានចុះទៅចំណុចទីតាំងខាងលើ បំណងថតផ្សាយព័ត៌មានពីបទល្មើសល្បែងស៊ីសងក្នុងមូលដ្ឋាន ដើម្បីឲ្យសមត្ថកិច្ចបានដឹង និងបើកប្រតិបត្តិការបង្រ្កាប ព្រោះយើងដឹងស្រាប់ហើយថា ល្បែងស៊ីសង ជាប្រភពនៃអំពើចោរកម្ម និងបទល្មើសផ្សេងៗទៀត។
ពេលអ្នកកាសែតទៅដល់ទីតាំងនេះ ពិតជាបានឃើញថា ហាងកាហ្វេនោះមានបង្កប់ល្បែងស៊ីសងមែន ដោយឃើញមានអ្នកញៀនល្បែងស៊ីសងជាច្រើននាក់កំពុងពពាក់ពពូនគ្នាភ្នាល់ដាក់ប្រាក់ចាក់មាន់តាមអនឡាញ។ ទន្ទឹមគ្នានោះ អ្នកកាសែត បានយកទូរស័ព្ទថតរូបភាពដែលពួកគេ កំពុងតែលេងល្បែងស៊ីសង បានយ៉ាងច្បាស់ៗចែស មិនអាចប្រកែកបាន។ តែរំពេចនោះ ម្ចាស់ទីតាំងល្បែងស៊ីសងនោះ និងអ្នកឈរកាងជាច្រើននាក់ បានចេញមកចាប់អ្នកកាសែត និងគំរាមវាយសម្លាប់ចោល ដែលសុទ្ធតែពាក្យសម្តីព្រហើនកោងកាច សាហាវព្រៃផ្សៃ ជាមនុស្សគ្មានសីលធម៌។ ទីបំផុត ដោយគ្មានជម្រើស និងដើម្បីសុវត្ថិភាពផ្ទាល់ខ្លួនផង អ្នកកាសែតត្រូវបង្ខំចិត្តលុបរូបភាពទាំងនោះចោលវិញ តាមការចង់បានរបស់ពួកគេ តែយ៉ាងណា ក៏នៅមានរូបភាព និងវីដេអូពីសកម្មភាពនៅពេលនោះខ្លះដែរ។
ប្រជាពលរដ្ឋនៅទីនោះ បានបង្ហើបឲ្យដឹងថា ហាងកាហ្វេនេះ មានបង្កប់ល្បែងស៊ីសងលេងរាល់ថ្ងៃ ដោយឃើញក្រុមអ្នកញៀនល្បែងស៊ីសងពពាក់ពពូនគ្នា ហើយស្រែកហ៊ោកញ្ជ្រៀវតម្លង់គេតម្លង់ឯង គ្មានក្រែងចិត្តអ្នកជិតខាងបន្តិចឡើយ ធ្វើឲ្យពួកគាត់ធុញទ្រាន់ជាខ្លាំង និងសំណូមពរដល់លោក ម៉ូវ ម៉ានិតអភិបាលខណ្ឌសែនសុខ និង លោក ហួរ ម៉េងវ៉ាង អធិការនគរបាលខណ្ឌសែនសុខ ជួយបង្រ្កាបទីតាំងល្បែងស៊ីសងនេះផង ស្របតាមគោលនយោបាយភូមិ-ឃុំមានសុវត្ថិភាព៕ 
ដោយ កែន សុខគីម
សូមប្រិយមិត្តទស្សនាវីដេអូ នូវសកម្មភាពម្ចាស់ទីតាំងល្បែងស៊ីសងនេះ សម្លុតគំរាមកំហែងលើអ្នកកាសែត ដូចខាងក្រោម៖
https://youtu.be/cnbWydfGfWY
