អ៊ុយក្រែន៖ ចក្រភពអង់គ្លេសកំពុងបញ្ជូនមីស៊ីលប្រឆាំងរថក្រោះរយៈចំងាយខ្លីទៅឲ្យប្រទេសអ៊ុយក្រែនសម្រាប់ការពារខ្លួន ក្រោយពេលរុស្សីប្រមូលផ្តុំកងទ័ព ១០០.០០០នាក់នៅព្រំដែនអ៊ុយក្រែន។ នេះបើយោងតាមការបញ្ជាក់របស់រដ្ឋមន្ត្រីការពារជាតិលោក Ben Wallace ។
លោកបានថ្លែងប្រាប់សមាជិកសភាដូច្នេះថា កងទ័ពមួយក្រុមតូចរបស់ចក្រភពអង់គ្លេសក៏នឹងត្រូវបញ្ជូនទៅកាន់ប្រទេសអ៊ុយក្រែនផងដែរដើម្បីផ្តល់ការហ្វឹកហាត់ដល់ទាហានអ៊ុយក្រែន។
លោកបញ្ជាក់ថា មានការព្រួយបារម្ភពិតប្រាកដ និងត្រឹមត្រូវដែលថាកងទ័ពរុស្សីនឹងត្រូវប្រើប្រាស់ដើម្បីធ្វើការឈ្លានពានអ៊ុយក្រែន។ ប៉ុន្តែរុស្សីបានបដិសេធរាល់ផែនការឈ្លានពាន និងចោទប្រកាន់ប្រទេសលោកខាងលិចថាមានកំហឹង។
កងទ័ពអង់គ្លេសជាច្រើនមានវត្តមាននៅក្នុងប្រទេសអ៊ុយក្រែនតាំងពីឆ្នាំ ២០១៥ ដើម្បីជួយបង្វឹកកងកម្លាំងអ៊ុយក្រែន ហើយចក្រភពអង់គ្លេស ក៏បានប្តេជ្ញាចិត្តជួយកសាងកងទ័ពជើងទឹកអ៊ុយក្រែនផងដែរបន្ទាប់ពីមានការឈ្លានពានរបស់រុស្សីលើតំបន់គ្រីមេ (Crimea) នៅក្នុងឆ្នាំ ២០១៤។
ប៉ុន្តែរដ្ឋមន្ត្រីការពារជាតិអង់គ្លេសថ្លែងថា ចក្រភពអង់គ្លេសនឹងផ្តល់ការជួយបន្ថែមលើបញ្ហាសន្តិសុខក្រោមហេតុផលនៃការបង្កើនអាកប្បកិរិយាគំរាមកំហែងរបស់រុស្សី។ អាវុធប្រឆាំងរថពោះដែកមួយចំនួនត្រូវបានបញ្ជូនទៅកាន់ប្រទេសអ៊ុយក្រែននៅថ្ងៃច័ន្ទ។
លោកថ្លែងប្រាប់សមាជិកសភាដូច្នេះថា «អ៊ុយក្រែនមានសិទ្ធិការពារព្រំដែនរបស់ខ្លួន ហើយកញ្ចប់ជំនួយថ្មីនេះជួយពង្រឹងសមត្ថភាពរបស់អ៊ុយក្រែន»។
«ខ្ញុំសូមបញ្ជាក់ឲ្យច្បាស់ថា ការគាំទ្រនេះមានអាវុ.ធការពាររយៈចំងាយខ្លី។ អាវុ.ធទាំងនោះមិនមែនជាអាវុ.ធយុទ្ធសាស្ត្រទេ និងគ្មានការគំរា.មកំហែងដល់រុស្សីឡើយ។ អាវុ.ធទាំងនោះត្រូវប្រើដើម្បីការពារខ្លួន»។
រដ្ឋមន្ត្រីការពារជាតិរូបនេះដដែលបញ្ជាក់ទៀតថា «កញ្ចប់ទណ្ឌកម្មអន្តរជាតិត្រៀមខ្លួនរួចជាស្រេច ប្រសិនរុស្សីចាត់វិធានការធ្វើឲ្យអស្ថេរភាពនៅអ៊ុយក្រែន»។
លោកបន្ថែមទៀតថា រាល់ការឈ្លានពានទាំងឡាយនឹងចាត់ទុកជាចូលកាន់កាប់ដែលអាចនឹងធ្វើឲ្យមានការបាត់បង់អាយុជីវតទាំងសងសាង។
«យើងប្រាថ្នាធ្វើជាមិត្តជាមួយប្រជាជនរុស្សី ដូចដែលយើងធ្វើនឹងគ្នាអស់រាប់រយឆ្នាំមកហើយ។ មានពិភពលោកដែលយើងអាចបង្កើតទំនាក់ទំនងប្រកបដោយផលប្រយោជន៍ទៅវិញទៅមកជាមួយនឹងរុស្សី»។
«ខ្ញុំនៅតែសង្ឃឹមថាការទូតនឹងឈ្នះ។ វាគឺជាជម្រើសរបស់ប្រធានាធិបតី Putin ថាតើជ្រើសរើសយកការទូត និងការសន្ទនា ឬជម្លោះ និងផលវិបាក»។
ចំណែកឯកអគ្គរដ្ឋទូតអ៊ុយក្រែនប្រចាំចក្រភពអង់គ្លេសលោក Vadym Prystaiko បានស្វាគមន៍ចំពោះការសម្រេចចិត្តរបស់អង់គ្លេសក្នុងការបញ្ជូនអាវុ.ធ និងទ័ពបន្ថែមទៅជួយអ៊ុយក្រែន ប៉ុន្តែលោកថ្លែងថា បញ្ហាដ៏ធំបំផុតគឺថា អ៊ុយក្រែនមិនមែនជាសមាជិកអង្គការណាតូ (Nato) ៕