ខេត្តកោះកុង ៖ នៅថ្ងៃទី១២ ខែមករា ឆ្នាំ២០២២ វេលាម៉ោង១១និង៣០នាទី មានករណីអគ្គីភ័យឆាបឆេះផ្ទះប្រជាពលរដ្ឋអស់ចំនួន០៣ខ្នង ត្រង់ចំណុចមាត់ទឹកស្មាច់ង៉ាមស្ថិតនៅភូមិ១ សង្កាត់ស្មាច់មានជ័យ ក្រុងខេមរភូមិន្ទ ។
ក្នុងហេតុការណ៍នេះ កម្លាំងប៉ុស្តិ៍នគរបាលរដ្ឋបាលស្មាច់មានជ័យ សហការជាមួយកម្លាំងអគ្គិភ័យខេត្ត និងអាជ្ញាធរភូមិសង្កាត់ បានពន្លត់និងទប់ស្កាត់មិនឲ្យឆេះរាលដាលទៅផ្ទះដទៃទៀត ។
ករណីនេះធ្វើឲ្យខូចខាតផ្ទះចំនួន៣ខ្នង ៖ ផ្ទះទី១ មានទំហំទទឹង៤.៨ម៉ែត្រ បណ្តោយ១៦ម៉ែត្រ ធ្វើអំពីឈើប្រក់ស៊ីប្រូ ឆេះខូចខាតផ្នែកខាងក្រោយ(ផ្ទះបាយ) និងអីវ៉ាន់លក់ដូរចាប់ហ៊ួយមួយចំនួន មានឈ្មោះ សុខ សារឿន ភេទប្រុស អាយុ៥៥ឆ្នាំ មុខរបរមន្ត្រីកងរាជអាវុធហត្ថខេត្ត និងប្រពន្ធឈ្មោះ ចាន់ បុប្ជា ភេទស្រី អាយុ៣១ឆ្នាំ ទីលំនៅបច្ចុប្បន្នភូមិ១ សង្កាត់ស្មាច់មានជ័យ។
ផ្ទះទី២ មានទំហំទទឹង៥ម៉ែត្រ បណ្តោយ១៦ម៉ែត្រ ធ្វើអំពីឈើប្រក់ស័ង្កសី ធ្វើឲ្យខូចខាតអស់ស័ង្កសី២០សន្លឹក ជាកម្មសិទ្ធិរបស់ឈ្មោះ គា យ៉ាង ភេទប្រុស អាយុ៥៦ឆ្នាំ មុខរបរនេសាទ ទីលំនៅបច្ចុប្បន្នភូមិ១ សង្កាត់ស្មាច់មានជ័យ ។ ចំណែក ផ្ទះទី៣ ទំហំទទឹង៦ម៉ែត្រ បណ្តោយ១៤ម៉ែត្រ ធ្វើអំពីឈើប្រក់ស័ង្កសី ធ្វើឱ្យខូចខាតស័ង្កសី៣៣សន្លឹក អស់ជញ្ជាំងមួយចំហៀង និងសម្ភារៈមួយចំនួន កម្មសិទ្ធិរបស់ឈ្មោះស៊ុ ឆាយ ភេទប្រុស អាយុ៥០ឆ្នាំ មុខរបរនេសាទ ទីលំនៅបច្ចុប្បន្នភូមិ ១ សង្កាត់ស្មាច់មានជ័យ ។
ហេតុការណ៍នេះ សមត្ថកិច្ចបានប្រើប្រាស់រថយន្តពន្លត់អគ្គីភ័យរបស់ស្នងការដ្ឋាននគរបាលខេត្តកោះកុងចំនួន០២គ្រឿង ៕