រដ្ឋធានីវ៉ាស៊ីតោន៖ ជោគវាសនាមនុស្សម្នាក់មើលមិនឃើញនោះឡើយ ហើយក៏គ្មានអ្នកណាម្នាក់បានដឹង ឬទស្សន៍ទាយពីថ្ងៃស្អែកបានដែរ តួយ៉ាងដូចជាអតីតកុមារខ្មែរម្នាក់ បានរត់ភៀសខ្លួន រួចផុតពីសេចក្ដីស្លាប់ នៅក្នុងរបបវាលពិឃាត ហើយជីវិតរសាត់អណ្ដែតយ៉ាងលំបាកវេទនា រហូតដល់សហរដ្ឋអាមេរិក និង មានវាសនាខ្ពង់ខ្ពស់បំផុត ក្លាយជាចៅហ្វាយក្រុងឡូវ៉ែល (Lowell) ដោយបានសម្ពោធឡើងកាន់តំណែង កាលពីថ្ងៃទី៣ ខែមករា ឆ្នាំ២០២២។
បើតាមសារព័ត៌មាន VOA Khmer បានផ្សាយថា លោក ចៅ សុខារី ក្លាយជាពលរដ្ឋអាមេរិកាំងដើមកំណើតខ្មែរលើកដំបូង បានជាប់ឆ្នោតជាចៅហ្វាយក្រុង Lowell រដ្ឋ Massachusetts សហរដ្ឋអាមេរិក។ លោក ចៅ សុខារី ទទួលបានសំឡេងគាំទ្រជាឯកច្ឆន្ទ ពីសមាជិកក្រុមប្រឹក្សាក្រុងដទៃទៀត។ អតីតកុមារភៀសខ្លួន បានខិតខំតស៊ូ រហូតបានសម្រេចក្តីសុបិន នៅលើទឹកដីសហរដ្ឋអាមេរិក បើទោះជាកំព្រាឪពុក ដែលត្រូវបានរបបកុម្មុយនិស្តខ្មែរក្រហមសម្លាប់ក៏ដោយ។
បើតាមសារព័ត៌មាន WGBH បានចេញផ្សាយ កាលពីថ្ងៃទី៤ ខែមករា ឆ្នាំ២០២២ ថា នៅក្នុងអំឡុងឆ្នាំ១៩៧៩ លោក ចៅ សុខារី ជាកុមារម្នាក់រត់តាមម្តាយ និងបងប្អូនប្រាំមួយនាក់ ដើរឆ្លងកាត់ព្រៃ ខណៈពួកគេបានរត់ភៀសខ្លួន ចេញពីរបបវាលពិឃាតខ្មែរក្រហម ឆ្ពោះទៅកាន់ជំរំជនភៀសខ្លួន នៅក្នុងប្រទេសថៃ។ ប៉ុន្ដែជាភ័ព្វសំណាងដ៏ខ្ពស់បំផុតមួយរបស់ជនជាតិខ្មែរ កាលពីថ្ងៃចន្ទ ទី៣ ខែមករា ឆ្នា២០២២ លោក ចៅ សុខារី ត្រូវបានបោះឆ្នោតជ្រើសរើសជាអភិបាលក្រុង Lowell រដ្ឋ Massachusetts សហរដ្ឋអាមេរិក ហើយលោកក្លាយជាពលរដ្ឋអាមេរិកាំងដើមកំណើតខ្មែរដំបូង បានកាន់តំណែងកំពូលនេះ។
លោក ចៅ សុខារី អភិបាលក្រុង Lowell បានបញ្ជាក់យ៉ាងខ្លីថា ចាប់តាំងពីលោកបានមកដល់សហរដ្ឋអាមេរិក លោកមិនដែលនឹកស្មានដល់ថា ពលរដ្ឋខ្មែរ ក៏រូបលោកផ្ទាល់បានកាន់តំណែងកំពូល នៅក្នុងរដ្ឋ Lowell ដែលមានប្រជាពលរដ្ឋខ្មែរជាង១០ម៉ឺននាក់រស់នៅនោះឡើយ៕
