រដ្ឋធានីហាណូយ៖ គិតត្រឹមអំឡុងចុងខែធ្នូ ឆ្នាំ២០២១កន្លងមកនេះ ទ្រព្យសម្បត្ដិសរុបរបស់មហាសេដ្ឋីវៀតណាម ចំនួន៦នាក់ បានកើនដល់ជិត២០ពាន់លានដុល្លារសហរដ្ឋអាមេរិក។
បើតាមសារព័ត៌មានវៀតណាម Vietnam Net បានចេញផ្សាយ កាលពីព្រឹក ថ្ងៃទី៦ ខែមករា ឆ្នាំ២០២២ ថា នៅត្រឹមថ្ងៃទី២៣ ខែធ្នូ ឆ្នាំ២០២១ ទ្រព្យសម្បត្ដិរបស់មហាសេដ្ឋីវៀតណាម ចំនួន៦នាក់ បានកើនឡើង ជិត២០ពាន់លានដុល្លារសហរដ្ឋអាមេរិក ដោយកើនឡើងជិត៣ពាន់លានដុល្លារ បើធៀបនឹងតួលេខដែលទស្សនាវដ្ដី Forbes បានប្រកាស នៅដើមឆ្នាំ២០២២។
នៅក្នុងអំឡុងដើមខែមេសា ឆ្នាំ២០២១ Forbes បានប្រកាសបញ្ជីឈ្មោះមហាសេដ្ឋីលំដាប់ពិភពលោក ហើយក្នុងនោះមានមហាសេដ្ឋីវៀតណាម ចំនួន៦នាក់ផងដែរ។ នៅពេលនោះ ទ្រព្យសម្បត្ដិសរុបរបស់មហាសេដ្ឋីវៀតណាម ទាំងនេះ មានតម្លៃ ១៦,៧ពាន់លានដុល្លារសហរដ្ឋអាមេរិក។ ប៉ុន្ដែចូលមកដល់ថ្ងៃទី២៣ ខែធ្នូ ឆ្នាំ២០២១ Forbes ក៏បានប្រកាសទៀតថា ទ្រព្យសម្បត្ដិរបស់មហាសេដ្ឋីវៀតណាម ទាំង៦នាក់នេះ កើនឡើង រហូតដល់ ១៩,៥ពាន់លានដុល្លារសហរដ្ឋអាមេរិក ដោយកើនឡើង ជិត៣ពាន់លានដុល្លារ។ លទ្ធផលនេះ បានមកពីការកើនឡើងយ៉ាងខ្លាំង នៃតម្លៃភាគហ៊ុន នៃអាជីវកម្ម ដែលពាក់ព័ន្ធ ក្នុងអំឡុងឆ្នាំនោះ។
បើតាម Forbes បានធ្វើបច្ចុប្បន្នភាព នៅត្រឹមថ្ងៃទី២៣ ខែធ្នូ ឆ្នាំ២០២១ ៖
១-លោក Pham Nhat Vuong ម្ចាស់ក្រុមហ៊ុនអភិវឌ្ឍអចលនទ្រព្យ និង ជាប្រធានក្រុមហ៊ុន Vingroup ហើយគាត់ក៏ជាអ្នកមានបំផុត នៅក្នុងប្រទេសវៀតណាម ដោយមានទ្រព្យសម្បត្ដិ កើនដល់៧,៥ពាន់លានដុល្លារសហរដ្ឋអាមេរិក។
២-លោក Tran Dinh Long ប្រធានក្រុមហ៊ុន Hoa Phat Group ឈរនៅលំដាប់ទី២ មានទ្រព្យសម្បត្ដិ ៣,១ពាន់លានដុល្លារសហរដ្ឋអាមេរិក។
៣-លោក Ho Hung Anh ម្ចាស់ក្រុមហ៊ុន Techcombank មានទ្រព្យសម្បត្ដិ២,៦ពាន់លានដុល្លារសហរដ្ឋអាមេរិក។
៤-លោក Nguyen Thi Phuong Thao ម្ចាស់ក្រុមហ៊ុនអាកាសចរណ៍វៀតណាម Vietjet មានទ្រព្យសម្បត្ដិ ២,៥ពាន់លានដុល្លារសហរដ្ឋអាមេរិក។
៥-លោក Nguyen Dang Quang ម្ចាស់ក្រុមហ៊ុន Massan មានទ្រព្យសម្បត្ដិ ២,២ពាន់លានដុល្លារសហរដ្ឋអាមេរិក។
៦-លោក Tran Ba Duong ម្ចាស់ក្រុមហ៊ុន Thaco និង សមាជិកគ្រួសាររបស់គាត់ មានទ្រព្យសម្បត្ដិ ១,៦ពាន់លានដុល្លារសហរដ្ឋអាមេរិក៕