រដ្ឋធានីហាណូយ៖ រហូតមកដល់ពេលនេះ សាកលវិទ្យាល័យជាច្រើន នៅក្នុងប្រទេសវៀតណាម បានតម្រូវឲ្យមានការធ្វើតេស្ដ IELTS (ប្រព័ន្ធធ្វើតេស្ដភាសាអង់គ្លេសអន្ដរជាតិ) និង ការធ្វើតេស្ដតាមលក្ខណៈអន្ដរជាតិដទៃទៀត មុននឹងអនុញ្ញាតឲ្យចូលរៀន ហើយសកម្មភាពបែបនេះ ក៏ជាការពង្រឹងនូវគុណភាព នៅក្នុងប្រព័ន្ធសិក្សាធិការជាតិ នៃប្រទេសអាស៊ានមួយនេះដែរ។
បើតាមសារព័ត៌មានវៀតណាម Vietnam Net បានចេញផ្សាយ នៅថ្ងៃទី៦ ខែមករា ឆ្នាំ២០២២ ថា វាពិតជាពិបាកខ្លាំងណាស់ សម្រាប់ការទទួលបានវិញ្ញាបនបត្រ IELTS ឈានដល់តំបន់ជនបទ ដោយសារគ្រួសារជាច្រើន កំពុងបញ្ជូនកូនៗរបស់ពួកគេ ទៅកាន់ទីក្រុងហាណូយ ដើម្បីចូលរៀនវគ្គ IELTS ។ ជាមួយគ្នានេះដែរ ឪពុកម្ដាយជាច្រើន មើលឃើញថា ILETS ជាលិខិតឆ្លងដែន ដើម្បីចូលរៀន នៅក្នុងសាកលវិទ្យាល័យល្បីៗ នៅក្នុងប្រទេសវៀតណាម។
នៅតាមសាកលវិទ្យាល័យនានា នៅក្នុងប្រទេសវៀតណាម ការប្រើប្រាស់ IELTS ឬវិញ្ញាបនបត្រអន្តរជាតិផ្សេងទៀត ដូចជា SAT ឬ TOEFL ក៏ជាលក្ខណៈវិនិច្ឆ័យអាទិភាពមួយសម្រាប់ការចូលរៀន។ សកម្មភាពបែបនេះ ក៏ជាការបង្ហាញពីបំណងប្រាថ្នា នៅក្នុងការរួមបញ្ចូលជាមួយការអប់រំកម្រិតខ្ពស់ នៅក្នុងប្រទេសអភិវឌ្ឍន៍ ឬប្រទេសរីកចម្រើន។ នៅជួរមុខ នៃនិន្នាការនេះ សាកលវិទ្យាល័យជាតិវៀតណាម នៅទីក្រុងហាណូយ ចង់ជ្រើសរើសនិស្សិត សម្រាប់កម្មវិធីបណ្តុះបណ្តាល ដោយប្រើភាសាអង់គ្លេស សម្រាប់ការបង្រៀន។
សម្រាប់ឆ្នាំ២០២២នេះ សាលាសេដ្ឋកិច្ចឈានមុខគេ ចំនួន២ នៅក្នុងប្រទេសវៀតណាម រួមមាន សាកលវិទ្យាល័យពាណិជ្ជកម្មបរទេស និង សាកលវិទ្យាល័យសេដ្ឋកិច្ចជាតិ បានបន្ថែមវិធីសាស្ត្រចូលរៀនថ្មី មានដូចជា ការប្រឡងផ្សេងៗ និង តេស្ដ IELTS យ៉ាងហោចណាស់ទទួលបានពិន្ទុ ៦,៥។ យោងតាមសាកលវិទ្យាល័យពាណិជ្ជកម្មបរទេស (Foreign Trade University) នឹងអនុវត្ត ចំពោះកម្មវិធីកម្រិតខ្ពស់ និង កម្មវិធីដែលមានគុណភាពខ្ពស់ ត្រូវទាមទារឲ្យមានជំនាញភាសាអង់គ្លេស យ៉ាងស្ទាត់ជំនាញ។
លោកសាស្រ្ដាចារ្យបណ្ឌិត Nguyen Huu Tu សាកលវិទ្យាធិការរង នៃសាកលវិទ្យាល័យវេជ្ជសាស្រ្ដហាណូយ បានបញ្ជាក់ថា ដោយសារតែសាលាពេទ្យមានតែមួយគត់ នៅក្នុងប្រទេសវៀតណាម ដែលផ្តល់កម្មវិធីកម្រិតខ្ពស់ផ្នែកគិលានុបដ្ឋាក (សិក្សាជាភាសាអង់គ្លេស) បានចាប់ផ្តើម កាលពី១០ឆ្នាំមុន ដោយមាននិស្សិតជិតពាក់កណ្តាល បានបញ្ចប់ការសិក្សារបស់ខ្លួន។ ឥឡូវនេះ និស្សិត ដែលបានចេញពីសាលានេះ កំពុងតែធ្វើការ នៅតាមមន្ទីរពេទ្យធំៗជាច្រើន នៅក្នុងប្រទេសអាល្លឺម៉ង់។ ជាមួយគ្នានេះ សាកលវិទ្យាល័យនេះ សង្ឃឹមថា នឹងមានកម្មវិធីបណ្ដុះបណ្ដាលតាមលក្ខណៈអន្តរជាតិ និង វិធីសាស្រ្ដចុះឈ្មោះចូលរៀនថ្មីជាច្រើន សម្រាប់ទាក់ទាញសិស្សពូកែជាមួយជំនាញភាសាបរទេស៕