រាជធានីបាងកក៖ តាមរយៈអង្គការសុខភាពពិភពលោក ក៏ដូចជា មន្រ្ដីជំនាញសុខាភិបាលនានា បានអះអាង ពីវីរុសកូវីដ-១៩បំប្លែងខ្លួនថ្មីអូមីក្រុង (Omicron) នឹងមិនធ្វើឲ្យអ្នកឆ្លង ធ្លាក់ខ្លួនឈឺធ្ងន់ធ្ងរ ហើយមនុស្សជាតិទូទៅ នៅតែមិនច្បាស់ ពីមូលហេតុរបស់វា ទើបកំពូលអ្នកជំនាញវីរុសជនជាតិថៃ បានចេញមកពន្យល់ អំពីករណីនេះ។
សារព័ត៌មាន The Nation បានចេញផ្សាយ នៅថ្ងៃទី៥ ខែមករា ឆ្នាំ២០២២ ថា លោកវេជ្ជបណ្ឌិត យ៉ុង ភូវ៉ូរ៉ាវ៉ាន់ (Yong Poovorawan) បានពន្យល់ នៅលើទំព័រហ្វេសប៊ុករបស់លោក នៅថ្ងៃពុធ ទី៥ ខែមករា អំពីមូលហេតុវីរុសអូមីក្រុង ទំនងជាកាត់បន្ថយនូវរោគសញ្ញាធ្ងន់ធ្ងរ។ កត្ដាដែលធ្វើឲ្យការឆ្លងអូមីក្រុង មិនធ្លាក់ខ្លួនឈឺធ្ងន់ធ្ងរ មានមូលហេតុ៥យ៉ាង រួមមាន៖
១-ចំនួនឆ្លងលើកុមារបានកើនឡើង។ ភាគច្រើន នៃកុមារដែលបានឆ្លងវីរុសអូមីក្រុង មានរោគសញ្ញាស្រាល ឬមិនមានរោគសញ្ញា។ ភាពធ្ងន់ធ្ងរ នៃជំងឺ នឹងកើនឡើងទៅតាមអាយុរបស់អ្នកជំងឺ។
២-មនុស្សពេញវ័យ និងមនុស្សចាស់ ភាគច្រើន បានទទួលការចាក់វ៉ាក់សាំងរួចរាល់ហើយ។
៣-វីរុសកូវីដ-១៩បំប្លែងខ្លួនថ្មីអូមីក្រុង (Omicron) មានរោគសញ្ញាស្រាលជាងវីរុស Delta ហើយនេះផ្អែកលើការស្រាវជ្រាវយ៉ាងពិសេស នៅក្នុងប្រទេសអាហ្វ្រិកខាងត្បូង។
៤-ការស្រាវជ្រាវនោះ ក៏បានបង្ហាញផងដែរថា Omicron ជាទូទៅរកឃើញ នៅផ្នែកខាងលើច្រើនជាង នៅក្នុងសួត។
៥-យោងតាមទ្រឹស្ដីរបស់ Charles Darwin ភាវៈរស់នឹងសម្របខ្លួន ដើម្បីរស់។ មេរោគនឹងសម្របខ្លួន ប៉ុន្តែអ្នកជំងឺនឹងបង្កើតភាពស៊ាំ។ មេរោគនឹងមិនបង្កការខូចខាតច្រើនពេកទេ បើ ទោះជាវាអាចរស់នៅបានក៏ដោយ។
លោកវេជ្ជបណ្ឌិត បានបន្ថែមថា ជំងឺរាតត្បាតច្រើនតែមានសភាពធ្ងន់ធ្ងរពីដំបូង ប៉ុន្ដែក្រោយមកវាបានក្លាយទៅជាជំងឺឆ្លង។ ដោយឡែក នៅលើពិភពលោក ចំនួនអ្នកឆ្លងបានកើនឡើង រហូតដល់ជាង១លាននាក់ ក្នុងរយៈពេលមួយថ្ងៃ ខណៈអត្រាស្លាប់បានថយចុះយ៉ាងខ្លាំង បើធៀបនឹងរយៈពេលកន្លងមក។ រីឯអ្នកជំងឺ ភាគច្រើនមិនមានរោគសញ្ញា ហើយក៏ប្រហែលជាមិនចាំបាច់ធ្វើតេស្តបន្ដទៀតក៏ថាបានដែរ។
លោកវេជ្ជបណ្ឌិត Yong Poovorawan បានប៉ាន់ប្រមាណថា ចំនួនអ្នកជំងឺ អាចនឹងមានច្រើនជាងអ្វីដែលអង្គការសុខភាពពិភពលោក (WHO) បានរាយការណ៍ ហើយជំងឺនេះក៏មិនសូវមានរោគសញ្ញាធ្ងន់ធ្ងរ បន្ទាប់ពីមនុស្សទទួលបានភាពស៊ាំ ពីការឆ្លង ឬការចាក់វ៉ាក់សាំងរួចរាល់ហើយ។ WHO នឹងឈប់រាប់ចំនួនអ្នកជំងឺ ហើយមានតែអ្នកជំងឺដែលមានរោគសញ្ញាប៉ុណ្ណោះដែលនឹងត្រូវធ្វើតេស្ត ដោយសារការធ្វើតេស្ត RT-PCR មានតម្លៃខ្ពស់ណាស់៕