ថៃ៖ លោកជំទាវ Nualphan Lamsam ឈ្មោះហៅក្រៅ “ម៉ាដាម Pang” ដែលជាអ្នកចាត់ការទូទៅក្រុមជម្រើសជាតិថៃ បាននាំយកអំណោយថ្លៃៗជាច្រើនដើម្បីជូនទៅដល់ក្រុមបាល់ទាត់ជម្រើសជាតិ មុនពេលត្រូវឡើងទៅប្រកួតប៉ះជាមួយក្រុមជម្រើសជាតិវៀតណាមក្នុងវគ្គពាក់កណ្តាលផ្តាច់ព្រ័ត្រពានរង្វាន់ AFF Suzuki Cup 2020 នៅថ្ងៃស្អែកនេះ។ នេះបើយោងតាមការចុះផ្សាយរបស់សារព័ត៌មាន Zing News ដែលបានចុះផ្សាយកាលពីថ្ងៃទី២១ ខែធ្នូ ឆ្នាំ២០២១។
អំណោយដែលលោកស្រីបានយកទៅចែកជូននោះមានដូចជា ទូរសព្ទ iPhone 13 នាឡិកា Rolex លោកស្រីក៏បានរៀបចំកាបូបម៉ាកល្បីៗ ដើម្បីប្រគល់ជូនគ្រូជំនួយ និងគ្រូបង្វឹកផងដែរ ខណៈតម្លៃសរុបនៃអំណោយដែលសេដ្ឋីនី Pang នាំជូនក្រុមជម្រើសជាតិថៃគឺមានជាង ១លានបាត (ជាង៣ម៉ឺនដុល្លារអាមេរិក)។
លើសពីនេះទៅទៀត លោកស្រី Nualphan Lamsam បានសន្យាផ្ដល់ប្រាក់រង្វាន់លើកទឹកចិត្តដល់ទៅ២០លានបាត (៦០ម៉ឺនដុល្លារ) ប្រសិនបើក្រុមឈ្នះពាន AFF Suzuki Cup ២០២០ ៕
