គណៈកម្មការចំពោះកិច្ចរបស់សហព័ន្ធកីឡាបាល់ទាត់កម្ពុជា (FFC) បានចុះពិនិត្យកីឡដ្ឋានធំ នៃពហុកីឡដ្ឋានជាតិមរតកតេជោហើយ ដើម្បីដាក់សំណើដេញថ្លៃធ្វើម្ចាស់ផ្ទះការប្រកួតបាល់ទាត់ជើងឯកអាស៊ីអាគ្នេយ៍ AFF Suzuki Cup 2020 នាចុងឆ្នាំ២០២១ នេះ។
ការចុះពិនិត្យនេះ ដឹកនាំដោយលោកស្រី ពុធ ធីតា ប្រធានគណៈកម្មការចំពោះកិច្ច ក្រោយមានការសម្របសម្រួលពីគណៈកម្មាធិការជាតិអូឡាំពិកកម្ពុជា កាលពីល្ងាចថ្ងៃទី៣០ ខែសីហា ដើម្បីពិនិត្យនូវគ្រឿងបរិក្ខា និងហេដ្ឋារចនាសម្ព័ន្ធមួយចំនួន ក្នុងកីឡដ្ឋានជាតិមរតកតេជោ ដើម្បីដាក់សំណើស្នើធ្វើជាម្ចាស់ផ្ទះការប្រកួត AFF Suzuki Cup នាចុងឆ្នាំនេះផង និងសម្រាប់ត្រៀមដំណើរការការប្រកួតកីឡាបាល់ទាត់ ក្នុងព្រឹត្តិការណ៍ស៊ីហ្គេម ឆ្នាំ២០២៣ ផង។
ការចុះពិនិត្យកីឡដ្ឋានដ៏ទំនើបនេះដែរ ធ្វើឡើងក្រោយទទួលបានភ្លើងខៀវពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានគណៈកម្មាធិការជាតិ CAMSOC បន្ទាប់ពីឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានបង្ហាញពីបំណងចូលរួមដេញថ្លៃធ្វើម្ចាស់ផ្ទះពានរង្វាន់ប្រចាំតំបន់ ក្នុងសន្និបាតបូកសរុបការងារឆមាសទី១ និងលើកទិសដៅបន្ដការងារឆមាសទី២ ឆ្នាំ២០២១ របស់ CAMSOC កាលពីថ្មីៗនេះ។
ឯកឧត្តមប្រធានសហព័ន្ធ បានបង្ហាញពីបំណងចូលរួមដេញថ្លៃធ្វើម្ចាស់ផ្ទះពានរង្វាន់ AFF Suzuki Cup 2020 ដោយស្នើសុំរៀបចំការប្រកួតផ្ទាល់ នៅកីឡដ្ឋានធំនៃពហុកីឡដ្ឋានជាតិមរតកតេជោ ក្នុងគោលបំណងដើម្បីអបអរសាទរ និងផ្សព្វផ្សាយនូវសមិទ្ធផលដ៏អស្ចារ្យ នៃសំណង់ប្រវត្តិសាស្ដ្រដ៏មហាសាលនេះ ក៏ដូចជាផ្ដល់នូវចំណីចក្ខុដល់ប្រជាពលរដ្ឋក្នុងបរិបទកូវីដ-១៩។ ម្យ៉ាងវិញទៀត ក៏ដើម្បីជាការសាកល្បងកីឡដ្ឋានថ្មី និងពង្រឹងសមត្ថភាពកីឡាករសម្រាប់ត្រៀមការប្រកួតកីឡាស៊ីហ្គេម ២លើកចំពោះមុខផងដែរ។
សូមបញ្ជាក់ថា ពានរង្វាន់ AFF Suzuki Cup 2020 ត្រូវបានពន្យារពេលចំនួន ២លើកមកហើយ ដោយសារការរីករាលដាលខ្លាំងនៃជំងឺកូវីដ-១៩ ក្នុងតំបន់ ក៏ដូចជាលើពិភពលោក។ តាមការគ្រោងទុក ព្រឹត្តិការណ៍ប្រចាំតំបន់ដែលកម្ពុជាត្រៀមចូលរួមដេញថ្លៃធ្វើម្ចាស់ផ្ទះនេះ នឹងរៀបចំការប្រកួតពីថ្ងៃទី០៥ ខែធ្នូ ឆ្នាំ២០២១ ដល់ថ្ងៃទី០១ ខែមករា ឆ្នាំ២០២២ ខាងមុខ។ ប៉ុន្ដែបេក្ខភាពដែលមានបំណងចូលរួមដេញថ្លៃធ្វើម្ចាស់ មិនមែនមានតែកម្ពុជានោះទេ គឺមានគូប្រជែង ៣ប្រទេសផ្សេងទៀត រួមមានសិង្ហបុរី ថៃ និងឥណ្ឌូនេស៊ី៕
ប្រភព:CAMBODIA SEA GAMES 2023
