កីឡាករលោតទឹកជម្រើសជាតិអាមេរិក ដើមកំណើតខ្មែរ Jordan Pisey Windle បានឡើងវគ្គផ្ដាច់ព្រ័ត្រវិញ្ញាសាលោតទឹកកម្ពស់ ១០ម៉ែត្រ នៃព្រឹត្តិការណ៍កីឡាអូឡាំពិក ទីក្រុងតូក្យូ ឆ្នាំ២០២០ (Tokyo Olympic Games 2020) នៅប្រទេសជប៉ុនហើយ ក្រោយបញ្ចប់ការប្រកួតវគ្គពាក់កណ្ដាលផ្ដាច់ព្រ័ត្រ ដោយឈរលេខរៀងទី៩ នៅព្រឹកថ្ងៃទី០៧ ខែសីហា ឆ្នាំ២០២១ នេះ។
ការប្រកួតវគ្គពាក់កណ្ដាលផ្ដាច់ព្រ័ត្រ ដែលមានបេក្ខភាព ១៨នាក់នេះ ក៏មិនខុសពីការប្រកួតជម្រុះបឋមដែរ ដោយកីឡាករម្នាក់ៗ ត្រូវធ្វើការប្រកួត ៦ជុំ ដើម្បីសន្សំពិន្ទុ ហើយកីឡាកររកបានពិន្ទុច្រើនជាងគេ ១២នាក់ នឹងបានឡើងវគ្គផ្ដាច់ព្រ័ត្រ។ ជាលទ្ធផល កីឡាករមានដើមកំណើតពីខេត្តព្រះសីហនុ Jordan Pisey Windle បានបញ្ចប់ក្នុងចំណាត់ថ្នាក់លេខ៩ ក្រោយរកបាន ៤០៩.៨០ពិន្ទុ ខណៈកីឡាករចិន Cao Yuan ឈរកំពូលតារាងរកបាន ៥១៣.៧០ពិន្ទុ។
សម្រាប់ការប្រកួតវគ្គផ្ដាច់ព្រ័ត្រវិញ្ញាសាលោតទឹកកម្ពស់ ១០ម៉ែត្រ នឹងធ្វើឡើងនាវេលាម៉ោង ១រសៀលនេះ (ម៉ោងនៅកម្ពុជា) នៅមជ្ឈមណ្ឌលហែលទឹក Tokyo Aquatics Center។ សូមជូនពរកីឡាករមានឈាមជ័រជាជនជាតិខ្មែរ Jordan Pisey Windle សូមជួបតែសំណាងល្អ និងទទួលបានលទ្ធផលល្អក្នុងការប្រកួតវគ្គដ៏សំខាន់នេះ៕
ប្រភព: CAMBODIA SEA GAMES 2023
