លោក បូរ ពុធរាត្រី គ្រូបង្វឹកកីឡាអត្តពលកម្មជម្រើសជាតិកម្ពុជា បានឲ្យដឹងថា នៅព្រឹកថ្ងៃទី២៨ ខែកក្កដានេះ កីឡាករ ប៉ែន សុគង់ បានចូលរួមហ្វឹកហាត់ពិសេស នៅពហុកីឡដ្ឋាន Olympic Stadium ជាមួយអត្តពលិកចម្រុះជាតិសាសន៍ផ្សេងទៀត ដើម្បីត្រៀមការប្រកួតកីឡាអូឡាំពិក ទីក្រុងតូក្យូ ឆ្នាំ២០២០ (Tokyo Olympic Games 2020) នាថ្ងៃសៅរ៍ ទី៣១ ខែកក្កដាចុងសប្ដាហ៍នេះ ។
លោកគ្រូបង្វឹកបានបញ្ជាក់ថា ការហ្វឹកហាត់ពិសេសនេះ គណៈកម្មការរៀបចំការប្រកួតផ្នែកកីឡាអត្តពលកម្ម បានអនុញ្ញាតឲ្យអត្តពលិកទាំងអស់ ចូលហាត់សមជាមួយឈ្នាន់ និងការបញ្ជាចេញដំណើរ នៅពហុកីឡដ្ឋាន Olympic Stadium ដែលជាទីលានប្រកួតផ្លូវការ ហើយការហ្វឹកហាត់ពិសេសនេះមានតែ ១ថ្ងៃនេះប៉ុណ្ណោះ ខណៈផុតពីនេះ កីឡាករ-កីឡាការិនី ត្រូវហ្វឹកហាត់នៅទីលានកម្ដៅសាច់ដុំវិញ រហូតដល់ថ្ងៃប្រកួតរៀងៗខ្លួន ។
សម្រាប់កីឡាករអត្តពលកម្មកម្ពុជា ប៉ែន សុគង់ នឹងត្រូវប្រកួតលើវិញ្ញាសារត់ល្បឿនចម្ងាយ ១០០ម៉ែត្រ នាវេលាម៉ោង ១៩៖៤៥នាទី ថ្ងៃទី៣១ ខែកក្កដា ឆ្នាំ២០២១ (ត្រូវនឹងម៉ោង ៥៖៤៥នាទីល្ងាចម៉ោងនៅកម្ពុជា) នៅពហុកីឡដ្ឋាន Olympic Stadium ។