បរទេស៖ ប្រធានាធិបតីទុយនេស៊ី បានបណ្ដេញនាយករដ្ឋមន្រ្ដីចេញពីតំណែង ហើយព្យួររដ្ឋសភា ក្រោយពេលមានការធ្វើបាតុកម្ម ប្រឆាំងនឹងរដ្ឋាភិបាល។
សារព័ត៌មាន Aljazeera បានចេញផ្សាយ នៅថ្ងៃទី២៦ ខែកក្កដា ថា ប្រធានាធិបតីទុយនេស៊ីបានព្យួររដ្ឋសភា និងបណ្ដេញលោក Hichem Mechichi ចេញពីតំណែងនាយករដ្ឋមន្រ្ដី នៅក្នុងសកម្មភាពថ្កោលទោស តាមរយៈការវាយប្រហារទៅលើលទ្ធិប្រជាធិបតេយ្យ ដោយគូប្រជែងរបស់លោក។
លោក Kais Saied ប្រធានាធិបតីទុយនេស៊ី បានថ្លែង កាលពីថ្ងៃទី២៥ ខែកក្កដា ថា លោកនឹងទទួលបានអំណាចប្រតិបត្តិ ដោយមានជំនួយពីនាយករដ្ឋមន្រ្តីថ្មី បន្ទាប់ពីការតវ៉ា ដោយអំពើហិង្សាផ្ទុះឡើង នៅក្នុងទីក្រុងជាច្រើន ទាក់ទងនឹងការគ្រប់គ្រងការរាតត្បាតពីជំងឺកូវីដ-១៩មិនបានល្អរបស់រដ្ឋាភិបាល និងសេដ្ឋកិច្ចជាតិចុះអន់ថយ។ នេះជាបញ្ហាប្រឈមមុខដ៏ធំបំផុត ចំពោះរដ្ឋធម្មនុញ្ញ ឆ្នាំ ២០១៤ ដែលបានបែងចែកអំណាច រវាងប្រធានាធិបតី នាយករដ្ឋមន្រ្តី និងសភាទុយនេស៊ី។
លោកប្រធានាធិបតី បានបញ្ជាក់នៅក្នុងសេចក្តីថ្លែងការណ៍មួយ នៅលើប្រព័ន្ធផ្សព្វផ្សាយរបស់រដ្ឋថា «មានមនុស្សជាច្រើន ត្រូវបានគេបោកបញ្ឆោត ដោយការលាក់ពុត ការក្បត់ និងការប្លន់សិទ្ធិរបស់ប្រជាជន»។
ទោះជាយ៉ាងណា ប្រជាពលរដ្ឋរាប់ពាន់នាក់ បានប្រឆាំងនឹងការរឹតត្បិត ដើម្បីទប់ស្កាត់វីរុស ហើយការផ្ទុះបាតុកម្ម កាន់តែខ្លាំងឡើង កាលពីព្រឹក ថ្ងៃអាទិត្យ (ទី២៥ ខែកក្កដា) នៅតំបន់ទុយនីស រដ្ឋធានី និងទីក្រុងផ្សេងៗទៀត។ ហ្វូងមនុស្ស ភាគច្រើន ជាយុវជនបានស្រែកថា « ចេញទៅ!» និងពាក្យស្លោកអំពាវនាវឱ្យរំលាយសភា ហើយរៀបចំការបោះឆ្នោតមុន កាលកំណត់៕
