បរទេស៖ ក្នុងរយៈពេលប៉ុន្មានថ្ងៃចុងក្រោយនេះ ប្រេស៊ីល និងឥណ្ឌូនេស៊ី មានចំនួនអ្នកបាត់បង់ជីវិត ដោយសារជំងឺកូវីដ-១៩ប្រចាំថ្ងៃច្រើនជាងគេ នៅលើពិភពលោក។
បើតាមគេហទំព័រ Worldometer បានផ្សាយ កាលពីព្រឹក ថ្ងៃទី១៧ ខែកក្កដា ឆ្នាំ២០២១ បានឲ្យដឹងថា ប្រេស៊ីលមានករណីស្លាប់ថ្មី ដោយជំងឺកូវីដ-១៩ ចំនួន១ ៤៥០នាក់ និងរកឃើញករណីឆ្លងថ្មី ៤៥ ៥៩១នាក់។ ជាមួយនឹងតួលេខឆ្លង និងករណីស្លាប់ថ្មីនេះ ធ្វើឲ្យប្រេស៊ីល មានអ្នកឆ្លងកូវីដ-១៩ សរុបជាង ១៩,៣លាននាក់ ហើយក្នុងនោះស្លាប់ ៥៤០ ៥០០នាក់ និងជាសះស្បើយជាង១៧,៩លាននាក់។
ឥណ្ឌូនេស៊ី មានករណីស្លាប់ថ្មី ១ ២០៥នាក់ និងរកឃើញមានអ្នកឆ្លងថ្មី ៥៤ ០០០នាក់។ ប្រទេសមានពលរដ្ឋច្រើន នៅក្នុងតំបន់អាស៊ានមួយនេះ មានអ្នកឆ្លងសរុបជាង ២,៧លាននាក់ ហើយក្នុងនោះមានអ្នកបាត់បង់ជីវិតកើនដល់៧១ ៣៩៧នាក់ ហើយក្នុងនោះមាននាក់ជាសះស្បើយជាង២,២លាននាក់។
សហរដ្ឋអាមេរិក ដែលជាប្រទេសរងគ្រោះខ្លាំងជាងគេ នៅលើពិភពលោក ហើយរហូតមកដល់វេលាខាងលើនេះ មានករណីស្លាប់ថ្មី ២៩៣នាក់ និងរកឃើញឆ្លងថ្មី ៣៨ ០៨២នាក់។ សហរដ្ឋអាមេរិក មានអ្នកឆ្លងសរុប ៣៤ ៩២៦ ៦៩៣នាក់ ហើយក្នុងនោះមានអ្នកស្លាប់ ៦២៤ ៦០៦នាក់ និងអ្នកជាសះស្បើយ ជាង២៩,៣លាននាក់។
ដោយឡែកចិនជាប្រភពកំណើត នៃវីរុសដ៏កាចសាហាវនេះ រកឃើញករណីឆ្លងថ្មី៣៦នាក់ តែមិនមានករណីស្លាប់ថ្មី។ ចិនមានអ្នកឆ្លងកូវីដ-១៩សរុប ៩២ ១៨៣នាក់ ហើយក្នុងនោះស្លាប់៤ ៦៣៦នាក់ និងមានអ្នកជាសះស្បើយ ៨៧ ០១១នាក់ ហើយចិនឈរនៅលេខរៀងទី១០២ នៃប្រទេសមានអ្នកឆ្លងកូវីដ-១៩ច្រើន នៅលើពិភពលោក។
គិតត្រឹមវេលាខាងលើនេះ ប្រទេស និងដែនដី ចំនួន២២០ កំពុងតែរងគ្រោះដោយសារវវិបត្ដិកូវីដ-១៩៕