សហព័ន្ធកីឡាបាល់ទាត់អាស៊ី (AFC) នៅថ្ងៃទី៧ ខែកក្កដា ឆ្នាំ២០២១ នេះ បានប្រកាសជាផ្លូវការ អំពីការលុបចោលការប្រកួតពានរង្វាន់ AFC Cup 2021 តំបន់អាស៊ីអាគ្នេយ៍ទាំងអស់ ដោយសារការរីករាលដាលខ្លាំង នៃជំងឺកូវីដ-១៩ ធ្វើឲ្យពិបាកស្វែងរកទីកន្លែងរៀបចំការប្រកួត ។
AFC បានបញ្ជាក់ថា ការប្រកួតតំបន់អាស៊ីអាគ្នេយ៍ ដែលមានពូលG, H, I និងការប្រកួតជម្រុះបឋមទាំងអស់ ត្រូវបានលុបចោល ដោយសារជំងឺរាតត្បាតជាសកលកូវីដ-១៩ មិនអាចរកទីកន្លែងរៀបចំការប្រកួតបាន ។ ដូច្នេះក្រុមបឹងកេត និងវិសាខា របស់កម្ពុជា រួមទាំងក្រុមផ្សេងៗ នៅតំបន់អាស៊ីអាគ្នេយ៍ ត្រូវខកខានការប្រកួតពានរង្វាន់ AFC Cup 2021 ទាំងអស់ ។
ពានរង្វាន់ AFC Cup 2021 បានបែងចែកជា ១០ពូល មកពី ៥តំបន់ផ្សេងគ្នា ។ ប៉ុន្ដែក្រោយលុបចោលការប្រកួតតំបន់អាស៊ីអាគ្នេយ៍ នៅសល់ ៤តំបន់ទៀត ត្រូវបន្ដការប្រកួតធម្មតា រួមមានតំបន់អាស៊ីខាងកើត អាស៊ីខាងត្បូង អាស៊ីកណ្ដាល និងអាស៊ីខាងលិច ។នេះជាលើកទី២ ហើយ ដែល AFC Cup បានលុបការប្រកួត AFC Cup ខណៈឆ្នាំមុន ក្រុមព្រះខ័នរាជស្វាយរៀង ប្រកួតបានពាក់កណ្ដាលទី ក៏ត្រូវបានលុបចោលការប្រកួតដែរ ។
តាមគម្រោងនៃការប្រកួតវគ្គជម្រុះក្នុងពូល មុន AFC សម្រេចលុបចោលការប្រកួតខាងលើ ក្រុមបឹងកេត ស្ថិតក្នុងពូល G ជាមួយក្លិប Hanoi (វៀតណាម), ក្លិប Bali United (ឥណ្ឌូណេស៊ី) និងក្រុមឈ្នះវគ្គជម្រុះ រវាងក្លិប Chanthabouly (ឡាវ) ឬក្លិប Kasuka (ព្រុយណេ) ។ ចំណែកវិសាខា ត្រូវបានដំឡើងចូលពូល I ជាមួយក្លិប Lalenok United (ទីម័រខាងកើត), ក្លិប Terengganu FC (ម៉ាឡេស៊ី) និងក្លិប Geylang International (សិង្ហបុរី) ៕
តាមពិតទៅប្រទេសសិង្ហបុរីត្រូវធ្វើជាម្ចាស់ផ្ទះ ក៏ប៉ុន្តែដោយសារតែមានវិបត្តិកូវីដ ១៩ ធ្វើអោយប្រទេសនេះសុំដកខ្លួនពីការធ្វើជាម្ចាស់ផ្ទះ។ AFC បានធ្វើការស្វែងរកម្ចាស់ផ្ទះថ្មីផងដែរ ក៏ប៉ុន្តែមិនមានប្រទេសណាមួយស្ម័គ្រចិត្តនោះទេ ដូច្នេះជម្រើសចុងក្រោយរបស់ AFC គឹមានតែរំសាយការប្រកួត AFC CUP នេះ៕
ប្រភព: The AFC